დღეიდან, ზამთრის პერიოდში ე.წ. ზამთრის საბურავების მქონე ავტომობილებით გადაადგილების ვალდებულება ძალაში შევიდა.

შს მინისტრის მოადგილის, ალექსანდრე დარახველიძის განცხადებით, 1-ელი დეკემბრიდან 1-ელ მარტამდე, საქართველოს მთავრობის მიერ დადგენილ ზონებში (უღელტეხილები, ასევე, მაღალმთიანი რეგიონები) დაწესდება მოთხოვნა, რომ სატრანსპორტო საშუალებას ოთხივე ბორბალი აღჭურვილი ჰქონდეს ზამთრის საბურავით. აღნიშნული მოთხოვნის შეუსრულებლობის შემთხვევაში, მძღოლს დაეკისრება ადმინისტრაციული სანქციები: ჯარიმა 100 ლარის ოდენობით და მართვის მოწმობაზე 5 ქულის დაკლება.

დარახველიძის ინფორმაციით, მეტეოროლოგიური პირობების გათვალისწინებით, განსაკუთრებულ შემთხვევებში, მოცურების საწინააღმდეგო ჯაჭვების ქონის ვალდებულებაც დაწესდება.

რაც შეეხება დადგენილ ზონებს, კონკრეტულ ლოკაციებთან დაკავშირებით დაზუსტებული ინფორმაცია უახლოეს დღეებში გახდება ცნობილი.