საოკუპაციო ხაზის პერიმეტრზე მდებარე სოფელ ნიქოზში 10 დეკემბერს საახალწლო ნაძვის ხე აინთება.

ღონისძიება სასკოლო პროექტის „მეურნეობა” ავტორების ინიციატივით იმართება.

ორგანიზატორების ინფორმაციით, აქტივობა, რომლის მიზანი ადგილობრივი მაცხოვრებლების განწყობის ამაღლებაა, ტრადიციული გახდება და ყოველ წელს გაიმართება.

ახალი წლის მთავარი აქსესუარი 18:00 საათზე საზეიმოდ აინთება.

„გვინდა დაგპატიჟოთ და დიდი სიხარულით გაგიზიაროთ, რომ 10 დეკემბერს 18:00 საათზე, პირველად და საზეიმოდ ავანთებთ ნიქოზის მთავარ ნაძვის ხეს. ღონისძიება ტრადიციული გახდება და ყველა მომდევნო ახალ წელს, უფრო ემოციურს და თბილს გახდის ჩვენი ბავშვებისთვის და ადგილობრივი მაცხოვრებლებისთვის.

ამავე დღეს, ჩვენ შემოგვაქვს და ვაფუძნებთ ახალ დღესასწაულს საქართველოში - მადლიერების დღეს და გთხოვთ, რომ ყველა აგვყვეთ და შემოგვიერთდეთ”, - აცხადებენ ორგანიზატორები.