საქართველოში ენერგეტიკის საკითხებში ევროკომისრის ვიზიტის ფარგლებში, ვიცე-პრემიერი ლევან დავითაშვილი და ევროკომისარი კადრი სიმსონი დღეს ქართლის ქარის ელექტროსადგურს ეწვივნენ და ელექტროსადგურის ინფრასტრუქტურას და მისი მუშაობის პროცესს გაეცნენ. 

პროექტი ევროკავშირსა და საქართველოს შორის ენერგეტიკის სფეროში თანამშრომლობის საფუძველზე განხორციელდა.

,,საქართველოში ენერგეტიკის საკითხებში ევროკომისრის ვიზიტის ფარგლებში, დღეს ვიცე-პრემიერი ლევან დავითაშვილი და კადრი სიმსონი ქართლის ქარის ელექტროსადგურს ეწვივნენ და პირადად გაეცნენ ელექტროსადგურის ინფრასტურუქტურას და მისი მუშაობის პროცესს.

ქართლის ქარის ელექტროსადგური საქართველოს ეკონომიკისა და მდგრადი განვითარების მინისტრმა და ევროკომისარმა ევროკავშირსა და საქართველოს შორის მაღალი დონის ენერგეტიკული დიალოგის ფორმატში თბილისში გამართული შეხვედრის შემდეგ დაათვალიერეს.

როგორც მათ აღნიშნეს, პროექტი ევროკავშირსა და საქართველოს შორის ენერგეტიკის სფეროში, კერძოდ კი განახლებადი ენერგიების სექტორში წარმატებული თანამშრომლობის მაგალითია. ქართლის ქარის ელექტროსადგურის პროექტი 2016 წელს ევროკავშირის ფინანსური მხარდაჭერით განხორციელდა, ელექტროსადგურის სიმძლავრე 20,7 მგვტ; გამომუშავება კი 84.1 მლნ. კვტ/სთ-ს შეადგენს. ის რეგიონში პირველი ამ ტიპის პროექტია.

დღეს მხარეების მიერ როგორც შეხვედრისას, ისე პრეს-კონფერენციაზე ხაზგასმულ იქნა, რომ განახლებადი ენერგიების განვითარების სფეროში საქართველოსა და ევროკავშირს შორის პარტნიორობა ერთ-ერთი პრიორიტეტული და პერსპექტიული მიმართულებაა და მომავალშიც გაგრძელდება კონკრეტული პროექტების სახით.

როგორც კადრი სიმსონმა აღნიშნა, მნიშვნელოვანია და საჭირო საქართველოში განახლებადი ენერგიების სექტორში, კერძოდ კი ქარისა და მზის ელექტროსადგურებში ინვესტირება, რათა ელექტროენერგიით ვაჭრობა მთელი წლის განმავლობაში შეუფერხებლად ხორციელდებოდეს”, - აღნიშნულია ინფორმაციაში, რომელსაც ეკონომიკისა და მდგრადი განვითარების სამინისტრო ავრცელებს.