საზოგადოება
13.11.2023 15:46
„ჩააცვი ხეებს“ - გორში საქველმოქმედო აქცია გაიმართა
გორში ტრადიციული საქველმოქმედო აქცია - „ჩააცვი ხეებს“ გაიმართა.
ღონისძიება გიორგი ერისთავის სახელობის სახელმწიფო დრამატული თეატრის სკვერში ჩატარდა.
აქციის ფარგლებში, მსურველებს შესაძლებლობა ჰქონდათ, სკვერში თბილი ტანსაცმელი მიეტანათ მათთვის, ვინც ზამთარს სხვადასხვა მიზეზით მომზადებული ვერ ხვდება.
ღონისძიება საქართველოს წითელი ჯვრის საზოგადოების გორის ფილიალის ორგანიზებით მოეწყო.
„საქველმოქმედო აქცია „ჩააცვი ხეებს“ მეხუთე წელია იმართება და საზოგადოებაში დიდი მოწონებით სარგებლობს. ღონისძიების ფარგლებში, ვაგროვებთ ტანსაცმელს და მოქალაქეებთან ერთად ვცდილობთ, ცხოვრება გავულამაზოთ მათ, ვისაც ყველაზე მეტად სჭირდება. შეგროვილი ტანსაცმელი საქართველოს წითელი ჯვრის გორის ფილიალში (ბარნოვის ქ. 9) გადამისამართდება, სადაც მსურველები ყოველ შაბათ-კვირას მივლენ და სასურველ ტანსაცმელს აარჩევენ“, - აცხადებენ ორგანიზატორები.
