2024 წლიდან საქართველოს მთავრობის გადაწყვეტილებით, უსახლკარო, მრავალშვილიანი ოჯახების საცხოვრებლით უზრუნველყოფის პროგრამა დაიწყება. ორწლიანი პროექტის ფარგლებში, სახლს ათასამდე სოციალურად დაუცველი ოჯახი მიიღებს.

პრემიერ-მინისტრის ირაკლი ღარიბაშვილის თქმით, აღნიშნული პროგრამის ბიუჯეტი 50 მილიონი ლარია.

„ჩვენ, ქვეყნის მასშტაბით, შევისწავლეთ სოციალურად დაუცველი, მრავალშვილიანი ოჯახების მდგომარეობა და მივიღეთ გადაწყვეტილება - სამ და მეტშვილიან, უსახლკარო და გაუსაძლის პირობებში მაცხოვრებელ 1000-ამდე ოჯახს შევუძინოთ ბინები, რათა იცხოვრონ ღირსეულ პირობებში.

ამ პროგრამის განხორციელებას გაისად დავიწყებთ და, დაახლოებით, ჯამურად 50 მილიონი ლარი დაიხარჯება, 25 მილიონი - 2024 წელს და ამდენივე თანხა მომდევნო წელს. ვფიქრობ, ძალიან მნიშვნელოვანია, ჩვენი მოქალაქეები სახელმწიფოსგან იღებდნენ ასეთ ყურადღებას და მიტოვებულად არ იგრძნონ თავი“, - განაცხადა პრემიერმა.