გორის მუნიციპალიტეტის სოფელ ზერტის ერთ-ერთ უბანში, სასმელი წყლის სისტემის მოწყობა იგეგმება. სამუშაოებისთვის 449 415 ლარია გათვალისწინებული, შესაბამისი სამუშაოების შესყიდვის მიზნით გამოცხადებულ ელექტრონულ ტენდერში მონაწილეებს კი, წინადადებების შეთავაზება 3-დან 11 მარტის ჩათვლით შეეძლებათ.

პროექტის თანახმად, იგეგმება ჭაბურღილის, საქლორატოროს, წყალსადაწნეო კოშკის, სანიტარული ზონისა და გამანაწილებელი ქსელის მოწყობა. გორის მუნიციპალიტეტის მერიაში განმარტავენ, რომ ტენდერის პირობების მიხედვით, პროექტით გათვალისწინებული სამუშაოები ხელშეკრულების გაფორმებიდან 6 თვეში უნდა დასრულდეს.

ცნობისთვის, აღნიშნულ უბანში 80-მდე ოჯახი ცხოვრობს, ადგილობრივები, სასმელ წყალს, დღემდე მეზობელი უბნებიდან ეზიდებიან. მალე ისინი წყალს საკუთარ ეზოებში ინდვიდუალური ონკანების საშუალებით მიიღებენ.