სპორტი
11.09.2023 16:09
გიორგი ტერაშვილმა და ლუკა ბაბუციძემ ევროპის ახალგაზრდულ ჩემპიონატზე ძიუდოში ოქროს და ბრინჯაოს მედლები მოიპოვეს
ნიდერლანდების ქალაქ ჰააგაში გამართულ ევროპის ახალგაზრდულ ჩემპიონატზე ძიუდოში, გორელმა სპორტსმენმა გიორგი ტერაშვილმა (73 კგ.) ჩემპიონის ტიტული მოიპოვა.
ტერაშვილმა, რომელიც კლუბ „გორიჯვრის“ წარმომადგენელია, მაკედონიელი, ბელგიელი, ბულგარელი და ბრიტანელი მოწინააღმდეგეები დაამარცხა. ოქროს მედლისთვის შეხვედრაში კი, პორტუგალიის სახელით მოასპარეზე ოთარ კვანტიძეს ვაზარით მოუგო და ჩემპიონატის გამარჯვებული გახდა.
მედლის გარეშე არ დარჩენილა გურამ პაპიტაშვილის სახელობის გორის ჭიდაობის კომპლექსური სპორტული სკოლის წარმომადგენელი ლუკა ბაბუციძეც (81 კგ.). სპორტსმენმა ჩემპიონატი ბრინჯაოს მედლით დაასრულა. ბაბუციძემ გადამწყვეტ შეხვედრაში ორი ვაზარით უკრაინელი სტანისლავ კორხემლიუკი დაამარცხა.
აღსანიშნავია, რომ ევროპის ახალგაზრდულ ჩემპიონატზე ძიუდოში, საქართველოს ნაკრები გუნდურში ევროპის ჩემპიონი გახდა.
