კურორტ შოვის ტერიტორიაზე 3 აგვისტოს მომხდარი სტიქიის შედეგად დაკარგული 4 ადამიანის ძებნა ინტენსიურ რეჟიმში გრძელდება. დაკარგულთა შორის სამი ბავშვი და ერთი ახალგაზრდა მამაკაცია. დღეს ნაპოვნი 29-ე გარდაცვლილი ბავშვია.

სამძებრო სამუშაოებში ჩართულია ცოცხალი ძალა, მძიმე ტექნიკა, მცურავი საშუალებები და კინოლოგთა ჯგუფი.

სტიქიის ზონაში დაუმუშავებელი ტერიტორია აღარ დარჩა, თუმცა, მოქალაქეთა თხოვნით, მიწის მასის გარკვეული ნაწილი ხელმეორედ დამუშავდა.

ნაპოვნი ცხედრებიდან 27 იდენტიფიცირებულია, ორის იდენტიფიცირება კი ჯერჯერობით ვერ მოხერხდა.

შეგახსენებთ, კურორტ შოვის ტერიტორიაზე სტიქია 3 აგვისტოს მოხდა, ძებნა-შველი ოპერაცია 3 აგვისტოდან ამ დრომდე გრძელდება, სტიქიის ზონიდან 210 ადამიანის უვნებლად გამოყვანა მოხერხდა.