გორის მუნიციპალიტეტის სოფელ სკრაში ლეგენდარული ფალავნების - შოთა ჩოჩიშვილის და კობა კურტანიძის სახელობის ტურნირი ჩატარდება ქართულ ჭიდაობაში.

როგორც „გორის მაცნესთან“ ტურნირის ინიციატორმა ანატოლი ავაზნელმა განაცხადა, შეჯიბრებაში მონაწილეობას 21 წლამდე ასაკის ჭაბუკი სპორტსმენები მიიღებენ. ისინი ერთმანეთს 5 წონით კატეგორიაში (60 კგ.,70 კგ., 80 კგ., 90 კგ. და აბსოლუტური) დაუპირისპირდებიან.

რაც შეეხება საპრიზო ფონდს, I ადგილზე გასულ სპორტსმენს 1000 ლარი გადაეცემა, II ადგილი - 500 ლარს, III ადგილის მფლობელი კი 300 ლარს მიიღებს.

აბსოლუტურ წონით კატეგორიაში მოასპარეზე სპორტსმენებიდან გამარჯვებული 2000 ლარს მიიღებს, II ადგილზე გასული - 1000 ლარს, ხოლო III ადგილოსანი 500 ლარით დაჯილდოვდება.

შეჯიბრების მონაწილეთა აწონვები 13:00 და 14:00 საათზე დაიწყება. ტურნირი კი სტარტს 15:00 საათზე აიღებს.

შეგახსენებთ, შოთა ჩოჩიშვილი პირველი ქართველი სპორტსმენია, რომელმაც ძიუდოში ოლიმპიური ოქრო მოიპოვა. კობა კურტანიძემ კი 1989 წელს მსოფლიოს ჩემპიონის ტიტული მოიპოვა, გარდა ამისა, იგი არაერთგზის ევროპის ჩემპიონიც გახლდათ.