სპორტი
26.06.2023 12:34
გორში საერთაშორისო ოლიმპიურ დღესთან დაკავშირებით მძლეოსნური გარბენი გაიმართა
საერთაშორისო ოლიმპიურ დღესთან დაკავშირებით, გორში მლეოსნური გარბენი გაიმართა. შეჯიბრებაში სხვადასხვა საჯარო სკოლის მოსწავლეები და მოზრდილები მონაწილეობდნენ. გამოვლინდნენ გამარჯვებულები და პრიზიორებიც.
შეჯიბრების გამარჯვებული ბექა ცილიკიშვილი გახდა, რომელიც გორის მესამე საჯარო სკოლის მოსწავლეა. მეორე ადგილზე მეცხრე საჯარო სკოლის მოსწავლე, ნოდარ მეგრელიშვილი გავიდა. ლუკა ცილიკიშვილმა (მესამე სკოლა) კი, გარბენი მესამე ადგილით დაასრულა.
ცნობისთვის, 23 ივნისი საერთაშორისო ოლიმპიური დღეა. თარიღი საერთაშორისო ოლიმპიური კომიტეტის დაფუძნებას უკავშირდება. საქართველოში ოლიმპიზმის დღისადმი მიძღვნილი ღონისძიებები 1994 წლიდან, მას შემდეგ იმართება, რაც საქართველოს ეროვნულმა ოლიმპიურმა კომიტეტმა საერთაშორისო აღიარება მოიპოვა.
