საზოგადოება
18.04.2023 14:32
სასოფლო-სამეურნეო კოოპერატივებისთვის ტექნიკის თანადაფინანსების სახელმწიფო პროგრამაში განაცხადების მიღება გრძელდება
სოფლის განვითარების სააგენტოს ინფორმაციით, სასოფლო-სამეურნეო კოოპერატივებისთვის ტექნიკის თანადაფინანსების სახელმწიფო პროგრამაში განაცხადების მიღება გრძელდება.
როგორც სააგენტოში აცხადებენ, თანადაფინანსების მოცულობა ტექნიკის ღირებულების არაუმეტეს 50%-ს, მაქსიმუმ 100 000 ლარს შეადგენს.
„თუ წარმოადგენთ სასოფლო-სამეურნეო კოოპერატივს, შესაძლებლობა გაქვთ, სასოფლო-სამეურნეო ტექნიკის შეძენის შემთხვევაში სახელმწიფო თანადაფინანსება მიიღოთ.
პროგრამაში მონაწილეობის მისაღებად, სასოფლო-სამეურნეო კოოპერატივის მეპაიეთა რაოდენობა არანაკლებ 10 წევრს უნდა შეადგენდეს.
სასოფლო-სამეურნეო კოოპერატივის ან მისი 10 მეპაიის საკუთრებაში არსებული მიწის ნაკვეთის ჯამური ფართობი კი უნდა იყოს არანაკლებ 20 ჰა. და მდებარეობდეს ერთ ადმინისტრაციულ ერთეულში. რაც შეეხება პროგრამის მიზანს, სასოფლო-სამეურნეო კოოპერაციის ხელშეწყობა და მათთვის სასოფლო-სამეურნეო ტექნიკაზე ხელმისაწვდომობის გაზრდაა“, - აცხადებენ სოფლის განვითარების სააგენტოში.
