საზოგადოება
16.03.2023 14:52
„მთავრობის კეთილსინდისიერების“ ინდექსით, საქართველო მსოფლიოს საუკეთესო 40 ქვეყანას შორის დასახელდა
მსოფლიოს მოწინავე კვლევითი ორგანიზაციის და ვაშინგტონის N1 ანალიტიკური ცენტრის - ჰერითიჯ ფაუნდეიშენის კვლევის მიხედვით, „მთავრობის კეთილსინდისიერების“ ინდექსით საქართველო მსოფლიოს საუკეთესო 40 ქვეყანას შორის დასახელდა, - ინფორმაციას აღნიშნულის შესახებ, საქართველოს მთავრობის ადმინისტრაცია ავრცელებს.
აღნიშნული ინფორმაციის მიხედვით, 2023 წელს საქართველო „მთავრობის კეთილსინდისიერების“ ინდიკატორით ევროკავშირის და ჩრდილოატლანტიკური ალიანსის წევრ 15 სახელმწიფოს უსწრებს. საქართველო ლიდერია კავკასიასა და შავიზღვისპირეთში, პოსტსაბჭოთა ქვეყნებს შორის კი მხოლოდ ბალტიის ქვეყნებს ჩამორჩება.
„მთავრობების კეთილსინდისიერება შეფასდა შემდეგი კრიტერიუმებით:
კორუფციის აღქმა;
მექრთამეობის რისკი;
კორუფციის კონტროლი, მათ შორის სახელმწიფოს „მიტაცება“ ელიტური და კერძო ინტერესებისთვის.
2022 წელს „მთავრობის კეთილსინდისიერების“ ინდიკატორში შეფასების 100 %-იანი სკალიდან საქართველომ 62.9 %-ი აიღო, რითაც 10-წლიანი პროგრესით მნიშვნელოვანი წინსვლა აჩვენა და პოზიცია 31 ადგილით გაიუმჯობესა“, - ნათქვამია ინფორმაციაში.
შედარებისთვის, 2012 წლის კვლევაში საქართველოს მთავრობის კეთილსინდისიერება 38 %-ით იყო აღნიშნული და მსოფლიოში 69-ე ადგილი ეკავა.
