საქართველოს თავდაცვის სამინისტროს გორის სამხედრო ჰოსპიტლის გადაუდებელი სამედიცინო დახმარების განყოფილების ხელმძღვანელის ინფორმაციით, გორში, კომბინატის დასახლების ტერიტორიაზე მომხდარი ავტოსაგზაო შემთხვევის შედეგად დაშავებული დედა-შვილის ჯანმრთელობის მდგომარეობა სტაბილურად მძიმეა. იგორ გეორგიანის განცხადებით, იგეგმება დაშავებული მოზარდის გადაყვანა ბავშვთა სპეციალიზებულ კლინიკაში.

„გადაუდებელი დახმარების განყოფილებაში შემოყვანილი იქნა ორი პაციენტი, ქალბატონი 35 წლის, მოზარდი 8 წლის, რომელთა მდგომარეობა არის სტაბილურად მძიმე. ჩატარებულია ყველა საჭირო სამედიცინო კვლევა და ლაბორატორიული ანალიზები. ამ ეტაპზე მათი მდგომარეობა არის სტაბილურად მძიმე. იგეგმება მოზარდის გადაყვანა ბავშვთა სპეციალიზებულ კლინიკაში“, - აღნიშნა იგორ გეორგიანმა

შეგახსენებთ, ავტოსაგზაო შემთხვევა, გორში, კომბინატის დასახლების ტერიტორიაზე მოხდა. მსუბუქი ავტომობილი ფეხით მოსიარულე დედა-შვილს დაეჯახა. დაშავებულები სასწრაფო დახმარების ბრიგადამ ჰოსპიტალში გადაიყვანა.

როგორც „გორის მაცნეს“  შინაგან საქმეთა სამინისტროში განუცხადეს, მომხდარ ფაქტზე გამოძიება საქართველოს სისხლის სამართლის კოდექსით 276-ე მუხლით მიმდინარეობს.