კლინიკების დაფინანსების მექანიზმი შეიცვალა, დაფინანსების ახალი მოდელი დღეიდან ამოქმედდა, რაც იმას ნიშნავს, რომ DRG სისტემით დაფინანსების მოცულობას პაციენტის დიაგნოზი, ასაკი, ჰოსპიტალიზაციის ხანგრძლივობა და სხვა კრიტერიუმები განსაზღვრავს.

ჯანდაცვის მინისტრის მოადგილის, ილია ღუდუშაურის ინფორმაციით, ცალკეული მომსახურებისთვის კლინიკებს პაციენტებისთვის დამატებითი ანაზღაურების მოთხოვნის უფლება აღარ ექნებათ.

ახალი სისტემის ამოქმედების შედეგად, სამედიცინო მომსახურების მიღებისას, პაციენტი მხოლოდ იმ თანხას გადაიხდის, რასაც საყოველთაო ჯანდაცვის პროგრამის ფარგლებში, თანაგადახდის წილი ითვალისწინებს ( 0-დან 30%-მდე, საყოველთაო ჯანდაცვის პროგრამის პაკეტების შესაბამისად).

,,თუ დღემდე, კლინიკას შეეძლო, რომ მოეთხოვა პაციენტისთვის თანაგადახდის გარდა დამატებითი დაფინანსება, მას შემდეგ რაც ახალი მოდელი ამოქმედდება, ამის უფლება კლინიკას აღარ ექნება. იცვლება მხოლოდ გადახდის პრინციპი. გადახდის პრინციპი არის ურთიერთობა კლინიკებსა და სახელმწიფოს შორის, პაციენტისთვის არაფერი იცვლება გარდა იმისა, რომ სახელმწიფო ადგენს ახალი თამაშის პირობებს კლინიკებისთვის. კონკრეტულ დიაგნოზზე განსაზღვრული არის კონკრეტული ტარიფი, არ აქვს მნიშვნელობა რა ჩარევა სჭირდება პაციენტს, ოპერაცია, რეანიმაცია თუ ა.შ. ყველა ეს ჩარევა უნდა გაკეთდეს და სახელმწიფო დიაგნოზის მიხედვით უხდის კლინიკას“, - აცხადებს ღუდუშაური.

ცნობისთვის, ამ ეტაპზე, DRG სისტემა არ გავრცელდება და დაფინანსება გაგრძელდება არსებული მეთოდით შემდეგ სამედიცინო მომსახურებაზე:

1. გეგმური დაგადაუდებელი ამბულატორია
2. ნეონატალური ასაკის (ნეონატალურ ასაკში დაწყებული) ინტენსიური მოვლა/მკურნალობა
3. გულის თანდაყოლილი მანკების მკურნალობა
4. მშობიარობა / საკეისრო კვეთა
5. ქიმიოთერაპია, ჰორმონოთერაპია და სხივური თერაპია და მასთან დაკავშირებული გამოკვლევები და მედიკამენტები
6. კომბუსტიოლოგია
7. თრომბოლიზისი და თრომბექტომია, ინსულტის შემთხვევაში
8. სხვა მაღალტექნოლოგიური სამედიცინო მომსახურება

შეგახსენებთ, რომ აღნიშნული მოდელი მხოლოდ საყოველთაო ჯანდაცვის პროგრამას ეხება და არ ვრცელდება კერძო სადაზღვევო კომპანიებზე.