საზოგადოება
26.10.2022 12:35
პირველი იანვრიდან ყველა სახის სიგარეტი სადა, ერთნაირი შეფუთვით გაიყიდება
საქართველოს ჯანდაცვის მინისტრის მოადგილის, თამარ გაბუნიას თქმით, თამბაქო პირველი იანვრიდან ახალი შეფუთვით გაიყიდება. ცვლილების მიხედვით, ყველა ტიპის კოლოფი იქნება ერთფეროვანი და აკრძალული იქნება ბრენდის, ლოგოს, სასაქონლო ნიშნის ან მისი აღმნიშვნელი სხვა ელემენტის გამოყენება.
„რაც შეეხება სადა შეფუთვას, გამოცემულია მთავრობის დადგენილება, რომელიც აზუსტებს ტექნიკურ მოთხოვნებს, თუ რას ნიშნავს სადა შეფუთვა. ამოქმედების ვადა 2023 პირველი იანვარია. რაიმე საფუძველი, რომ გადავადებაზე ვისაუბროთ, არ არსებობს. პირიქით, ტარდება ძალიან ბევრი შეხვედრა ყველა მონაწილე მხარის ჩართულობით, რათა მოთხოვნები, რომელიც უკავშირდება თამბაქოს კონტროლს, რაც არის უკვე დადგენილი საქართველოს კანონმდებლობით, შესრულდეს. აღნიშნულის განხორციელება გვაახლოებს ევროკავშირის მოთხოვნებთან, ევროდირექტივებთან და არის ძალიან მნიშვნელოვანი, რათა პრევენციული ზომები, რაც უკავშირდება თამბაქოს მოწევის შეწყვეტას და თამბაქოს მოწევით გამოწვეულ მთელ რიგ დაავადებებს, თავიდან ავიცილოთ“, - აცხადებს თამარ გაბუნია.
