საზოგადოება
21.10.2022 14:10
„გორის დღე - 2022“ 23 ოქტომბერს გაიმართება - გაეცანით, რას მოიცავს დღესასწაულის პროგრამა
ტრადიციული სახალხო დღესასწაული „გორის დღე - 2022“ 23 ოქტომბერს გაიმართება. ადგილობრივი თვითმმართველობის ინფორმაციით, სახალხო დღესასწაული ლომჭაბუკის სკვერის მიმდებარე ტერიტორიაზე გაიმართება და სხვადასხვა სახის კულტურულ, საგანმანათლებლო და სპორტულ სანახაობასა თუ აქტივობას მოიცავს. მოეწყობა ეთნოგრაფიული კუთხეები, ხელნაკეთი ნივთების და ყველა თაობის მხატვართა ნამუშევრების გამოფენა-გაყიდვა. წარმოდგენილი იქნება გორის საგანმანათლებლო დაწესებულებების და ადგილობრივი მეწარმეების პროდუქციის სტენდები, ტურისტული კუთხეები, ბავშვებისთვის განთავსდება ატრაქციონები.
„გორის დღე 2022“- ის ფარგლებში, ასევე გაიმართება კონცერტი ადგილობრივი შემსრულებლების მონაწილეობით, დღის ბოლოს კი, ტრადიციულად, ,,საპატიო გორელის“ წოდების მინიჭების ცერემონია შედგება.
„გორის დღე 2022 “-ს გალა-კონცერტი დაასრულებს.
შეგახსენებთ, სახალხო დღესასწაულის გამართვა პირველად 9 ოქტომბერს იყო დაანონსებული. ღონისძიება ორჯერ გადაიდო - პირველად უამინდობის, მეორედ კი, თბილისში, ვაკის პარკში მომხდარი ტრაგედიის გამო.
