შესაძლოა, საქართველოში ძველი ავტომობილების იმპორტი აიკრძალოს

27 ნოემბერი
ოთხშაბათი

3° C

საზოგადოება

13.09.2022 16:46

შესაძლოა, საქართველოში ძველი ავტომობილების იმპორტი აიკრძალოს

გარემოს დაცვისა და სოფლის მეურნეობის სამინისტროს ატმოსფერული ჰაერის სამმართველოს უფროსის, ნოე მეგრელიშვილის განცხადებით, შესაძლოა, ქვეყანაში ძველი ავტომობილების იმპორტი აიკრძალოს.

საუბარია ევრო 5-ზე დაბალი სტანდარტის მანქანების შემოყვანის შეზღუდვაზე, რაც თავის მხრივ, 2013 წლამდე გამოშვებულ მანქანებს შეეხება.

ნოე მეგრელიშვილის განცხადებით, ამ მიმართულებით მუშაობა დაწყებულია და აღსრულების მექანიზმის შემუშავების შემდეგ, შესაბამისი საკანონმდებლო ცვლილებები პარლამენტს დასამტკიცებლად წარედგინება.

„აუცილებლად უნდა შემოვიღოთ ავტომობილის ემისიის სტანდარტი, ანუ შევზღუდოთ ძველი და ბინძური ავტომობილების იმპორტი ქვეყანაში. ამის გარეშე, პროცესის - ატმოსფერული ჰაერის ხარისხის გაუმჯობესება - დაჩქარება გაძნელდება. ჩავატარეთ მოკვლევა, თუ რომელი ემისიის სტანდარტის შემოღება არის რეალისტური საქართველოში ამ პერიოდისთვის. იცით, რომ როგორც საწვავებს აქვთ ევროსტანდარტები, ისე აქვს ავტომობილებსაც, ამიტომ, ჩავატარეთ კვლევა, რომ დაგვედგინა, ევროსტანდარტის ქვემოთ რომელი ავტომობილის აკრძალვა შეიძლება. გამოვლინდა, რომ ევრო 5 სტანდარტის შემოღება რეალისტურია ქვეყანაში.

ტექნიკური რეგლამენტის სამუშაო ვერსია შემუშავებულია, უბრალოდ აღსრულების მექანიზმია ახლა შესათანხმებელი, თუ როგორ მოხდება საზღვარზე ავტომობილების პირველადი რეგისტრაციის დროს ამის გაკონტროლება და აღსრულება, რომ ევრო 5-ზე დაბალი სტანდარტის ავტომობილი ვეღარ დარეგისტრირდეს ჩვენ ავტოპარკში. აღსრულების მექანიზმის შემუშავების შემდეგ შესაბამისი საკანონმდებლო ცვლილებები შემუშავდება და პარლამენტს დასამტკიცებლად წარედგინება“, - განაცხადა ნოე მეგრელიშვილმა.

კვირის ამბები