ბათუმის საქალაქო სასამართლომ სრულად დააკმაყოფილა პროკურატურის შუამდგომლობა და 13 აგვისტოს, ქობულეთში მომხდარი მკვლელობის ფაქტზე დაკავებულ ლექსო ინდუაშვილს, რომელსაც ბრალდება 108-ე მუხლით წარედგინა, აღკვეთის ღონისძიებად პატიმრობა შეუფარდა.

პროკურატურის ინფორმაციით, ქ. ქობულეთში, ერთ-ერთი ღამის კლუბის მიმდებარე ტერიტორიაზე, ლ. ი.-მ ურთიერთშელაპარაკების ნიადაგზე, შურისძიების მოტივით, მოკვლის განზრახვით, თანნაქონი დანით სიცოცხლისათვის სახიფათო დაზიანებები მიაყენა რ. ლ.-ს.

მიყენებული დაზიანებების შედეგად, 21 წლის რ. ლ. კლინიკაში მიყვანიდან რამდენიმე საათში გარდაიცვალა.

სამართალდამცველებმა ბრალდებული ცხელ კვალზე იმავე დღეს დააკავეს. მას ბრალდება საქართველოს სისხლის სამართლის კოდექსის 108-ე მუხლით (განზრახ მკვლელობა) წარედგინა, რაც სასჯელის ზომად 10-დან 15 წლამდე თავისუფლების აღკვეთას ითვალისწინებს.

ბრალდებულის ინტერესებს ადვოკატი ზაზა მინდიაშვილი იცავს. ბათუმის საქალაქო სასამართლოში წინასასამართლო სხდომა 4 ოქტომბერს ჩაინიშნა.