საზოგადოება
19.04.2022 11:28
მძღოლობის კანდიდატს პრაქტიკული გამოცდის მეორე ეტაპის ჩაბარება ერთი წლის განმავლობაში შეეძლება
„საგზაო მოძრაობის შესახებ“ საქართველოს კანონში განხორციელებული ცვლილების შესაბამისად,”B” და “BE” კატეგორიის სატრანსპორტო საშუალების მართვის უფლების მისაღებად, პრაქტიკული გამოცდის მეორე ეტაპზე რიგის დაჯავშნა სავალდებულო იქნება.
ცვლილების თანახმად, რომელიც 25 აპრილიდან ამოქმედდება, მძღოლობის კანდიდატს, რომელმაც წარმატებით ჩააბარა თეორიული გამოცდა, უფლება აქვს პრაქტიკული გამოცდის პირველ ეტაპზე გავიდეს თეორიული გამოცდის წარმატებით ჩაბარებიდან, 30 კალენდარული დღის განმავლობაში.
პრაქტიკული გამოცდის პირველი ეტაპის წარმატებით ჩაბარების შემდეგ კი, მძღოლობის კანდიდატი დაჯავშნის მეორე ეტაპის გამოცდაზე გასასვლელ რიგს. მას უფლება ეძლევა პრაქტიკული გამოცდის მეორე ეტაპზე გავიდეს პირველი ეტაპის წარმატებით ჩაბარებიდან 1 წლის განმავლობაში. მეორე ეტაპზე უარყოფითი შეფასების მიღების შემთხვევაში, მძღოლობის კანდიდატი მომდევნო გამოცდაზე დაიშვება არაუადრეს 30 დღის ინტერვალით.
როგორც შინაგან საქმეთა სამინისტროს მომსახურების სააგენტოში აცხადებენ, მძღოლობის კანდიდატი, რომელიც 2022 წლის 25 აპრილამდე წარმატებით ჩააბარებს თეორიულ გამოცდას, სატრანპორტო საშუალების მართვის უფლება მიენიჭება 2022 წლის 25 აპრილამდე არსებული წესით.
