საზოგადოება
26.11.2021 12:23
ქალთა მიმართ ძალადობის წინააღმდეგ მიმართულ 16 დღიან კამპანიას მსოფლიოს 187 ქვეყანა და 5000-ზე მეტი ორგანიზაცია უერთდება
ქალებისა და გოგოების მიმართ ძალადობის წინააღმდეგ მიმართული 16 დღიანი კამპანია, რომელიც ყოველწლიურად იმართება, უკვე დაიწყო და 10 დეკემბრის ჩათვლით გაგრძელდება.
ქალებისა და გოგოების მიმართ ძალადობა, როგორც ადამიანის უფლებების უხეში, დაფარული და ამავდროულად, ყველაზე გავრცელებული დარღვევა, მსოფლიოსთვის ერთ-ერთ გამოწვევას წარმოადგენს. ამიტომ ქალთა მიმართ ძალადობის წინააღმდეგ 16 დღიანი კამპანია მსოფლიოში 1991 წლიდან იმართება, რომელსაც მსოფლიოს 187 ქვეყანა და 5000-ზე მეტი ორგანიზაცია უერთდება. კამპანია მიზნად ისახავს საზოგადოების ცნობიერების ამაღლებას ქალთა მიმართ ძალადობის საკითხებზე.
„ქალთა უფლებების დაცვა და ძალადობის წინააღმდეგ ბრძოლა საქართველოს მთავრობის პრიორიტეტია, რაც აისახება სხვადასხვა სფეროში მიღწეულ პროგრესში.
პანდემიით გამოწვეული დაბრკოლებების მიუხედავად, სახელმწიფო განაგრძობს მუშაობას ძალადობის პრევენციის, აღმოფხვრის და მსხვერპლთა და დაზარალებულთა სათანადო რეაბილიტაციის მიმართულებით.
2021 წლის 25 ნოემბრიდან 10 დეკემბრის ჩათვლით საქართველოს მთავრობის ადმინისტრაციის ადამიანის უფლებათა სამდივნოს კოორდინაციით სამთავრობო უწყებებისა და სამოქალაქო სექტორის აქტიური თანამშრომლობით გაიმართება საინფორმაციო ხასიათის ღონისძიებები, რომელიც ემსახურება საზოგადოების სხვადასხვა წრეების ინფორმირებას მოქმედი სამართლებრივი მექანიზმებისა და სახელმწიფო სერვისების შესახებ“, - ნათქვამია საქართველოს მთავრობის მიერ გავრცელებულ ოფიციალურ ინფორმაციაში.
