საქართველოს შინაგან საქმეთა სამინისტროს საგანგებო სიტუაციების მართვის სამსახურმა, გერმანიაში, 30 ერთეული თანამედროვე, ევროპული სტანდარტის სახანძრო ავტომობილი შეიძინა. სპეცდანიშნულების ტექნიკამ უკვე გაიარა სრული ინსპექტირება და საქართველოში მათი შემოყვანა უახლოეს მომავალში იგეგმება. აღნიშნული მანქანების საქართველოში ჩამოსვლამდე კი, გერმანელი ინსტრუქტორების დახმარებით, ქართველი მეხანძრე-მაშველები სპეციალურ გადამზადების კურსს გაივლიან.
როგორც შინაგან საქმეთა სამინისტროს საგანგებო სიტუაციების მართვის სამსახურში GMnews-ს განუცხადეს, სამსახურს აღებული აქვს კურსი, რომ მოძველებული, რუსული ავტომობილები თანამედროვე, ახალი, ევროპული სახანძრო-სამაშველო ტექნიკით ჩაანაცვლოს. „30 ერთეული სახანძრო ტექნიკა საქართველოში წლის ბოლომდე შემოვა. ამასთან, ახალი, ევროპული სტანდარტის ტექნიკა მუნიციპალური სახანძრო მანქანებია და მათ, საგანგებო სიტუაციების მართვის სამსახური მთელი საქართველოს მასშტაბით, სხვადასხვა ქალაქში გადაანაწილებს. „მაგირუსის“ ფირმის სახანძრო ტექნიკა მანევრულობით, მაღალი გამავლობითა და მობილურობით გამოირჩევა და მორგებულია იმ მოთხოვნებზე, რაც საქართველოს პირობებშია საჭირო“, - აღნიშნეს GMnews-სთან საუბრისას შინაგან საქმეთა სამინისტროს საგანგებო სიტუაციების მართვის სამსახურში.
სახანძრო მანქანები აღჭურვილია მაღალი და დაბალი წნევის ტუმბოთი, აქვს 4,5 ტონიანი წყლის ავზი და 300 ლიტრიანი ქაფის ავზი. მანქანებში, ასევე, დამონტაჟებულია ყველა საჭირო სახანძრო-სამაშველო აღჭურვილობა. ამასთან, სრულად ავტომატიზებულია, თუმცა, საჭიროების შემთხვევაში, შესაძლებელია მისი მექანიკური მართვა.