საზოგადოება
01.11.2021 14:00
კოვიდინფექციის დადასტურების გამო, გორის მუნციპალიტეტის საბავშვო ბაღების 7 ჯგუფი თვითიზოლაციაშია, დროებით არ ფუნქციონირებს 5 საბავშვო ბაღი
კოვიდინფექციის დადასტურების გამო, გორის მუნციპალიტეტის საბავშვო ბაღების 7 ჯგუფი თვითიზოლაციაშია, დროებით არ ფუნქციონირებს გორის მეორე, მეშვიდე, მეჩვიდმეტე, ორთაშენისა და კარალეთის ორი საბავშვო ბაღი - აღნიშნულის შესახებ GMnews-ს გორის მუნიციპალიტეტის სკოლამდელი აღზრდის სააგენტოს ხელმძღვანელმა განუცხადა.
ლია კოვზიაშვილის თქმით, ამ დრომდე სასწავლო პროცესი შეჩერებული ქვეშის, ვარიანისა და ხიდისთავის საბავშვო ბაღებშიც, თუმცა, აღნიშნულ დაწესებულებებში თვითიზოლაციის ვადა ამოიწურა და ეპიდემიოლოგების რეკომენდაციის საფუძველზე, დღეიდან, სწავლის განახლების რეკომენდაცია მიეცათ.
,,მოგეხსენებთ, უსაფრთხოების მიზნით, ინტენსიურად მიმდინარეობს სკოლამდელი აღზრდის ყველა დაწესებულების პერსონალის ტესტირება კორონავირუსზე. სწორედ ინტენსიური ტესტირების ფარგლებში გამოვლინდა ზემოაღნიშნული შემთხვევებიც, რაც შეეხება სწავლის განახლებას, საკითხი თითოეული ჯგუფის/სასწავლო დაწესებულების შემთხვევაში ინდივიდუალურად განიხილება და გადაწყვეტილებას ყოველთვის ეპიდემიოლოგების რეკომენდაციის საფუძველზე ვიღებთ“, - განაცხადა ლია კოვზიაშვილმა.
