უწყებათაშორისი საკოორდინაციო საბჭოს გადაწყვეტილებით, 13 სექტემბრიდან, ვაქცინაციის წახალისების მიზნით საქართველოს ეროვნული ლატარია გათამაშებას იწყებს.

როგორ მოხდება მოქალაქეების იდენტიფიცირება და კვირის რომელ დღეებში გაიმართება გათამაშება, ამ და სხვა დეტალებთან დაკავშირებით, საქართველოს ეროვნული ლატარიის კომპანიამ განცხადება გამოაქვეყნა.

კომპანიის ცნობით, პირველი აცრის გაკეთებისთანავე ბენეფიციარი მონაცემთა ბაზაში ავტომატურად მიიღებს გათამაშების ბილეთს, აცრიდან მეორე დღესვე კი, მიღებული ბილეთი ერთვება „აიცერი და მოიგეს’“ ყოველდღიურ, ყოველკვირეულ და შემაჯამებელ გათამაშებაში.

კომპანიის ინფორმაციით, ლატარიის გათამაშებები გაიმართება ვებგვერდზე www.stopcov.lotto.ge-ზე ყოველდღე 12 საათზე, ყოველკვირეული გათამაშება - ორშაბათს, ასევე 12 საათზე, ხოლო შემაჯამებელი გათამაშება - 31 დეკემბერს.

„აიცერი და მოიგე“ - StopCovid ლატარია ვაქცინაციის პროცესის სტიმულირებისთვის 13 სექტემბრიდან გაიმართება. საქართველოს მთავრობის ინიციატივით, ვაქცინაციის პროცესის წახალისების მიზნით, მოსახლეობას აცრასთან ერთად უკვე მოგებაც შეუძლია. ყველა ადამიანი, ვინც ერთხელ მაინც არის აცრილი ან აიცრება, მიიღებს ფულის მოგების წარმოუდგენელ შესაძლებლობას.

ყოველდღე გათამაშდება 100 და 500 ლარი მოგება, ყოველკვირეულად 1 000-დან 10 000 ლარამდე, ხოლო შემაჯამებელ გათამაშებაში, რომელიც 31 დეკემბერს „საქართველოს საზოგადოებრივი მაუწყებლის“ ეთერში გაიმართება, გათამაშდება 100 000 ლარი. ლატარიის გათამაშებები გაიმართება ვებგვერდზე www.stopcov.lotto.ge -ზე ყოველდღე 12 საათზე, ხოლო ყოველკვირეული - ორშაბათს, ყოველდღიური ლოტოს გათამაშების დასრულებისთანავე.

StopCovid ლატარიის „აიცერი და მოიგეს“ გათამაშების ბილეთებს აცრილი ბენეფიციარები სახელმწიფოსგან ვაქცინაციის დროს უფასოდ მიიღებენ.

ლატარიაში „აიცერი და მოიგე“ მონაწილეობს ყველა ვაქცინირებული ადამიანი მთელი საქართველოს მასშტაბით, ვაქცინირებული მომხმარებლების იდენტიფიცირება პირველი აცრის რეგისტრაციისას NCDC-ის ბაზაში მინიჭებული საიდენტიფიკაციო კოდის მიხედვით მოხდება.

პირველი აცრის გაკეთებისთანავე ბენეფიციარი მონაცემთა ბაზაში ავტომატურად მიიღებს გათამაშების ბილეთს, აცრიდან მეორე დღესვე მიღებული ბილეთი ერთვება „აიცერი და მოიგეს“’ ყოველდღიურ, ყოველკვირეულ და შემაჯამებელ გათამაშებაში. მომხმარებელი, რომელმაც კოვიდსაწინააღმდეგო ვაქცინაცია წამახალისებელი ლატარიის ამოქმედებამდე, 13 სექტემბრამდე ჩაიტარა, მონაწილეობას მიიღებს „აიცერი და მოიგეს“ ყველა გათამაშებაში. StopCovid ლატარიის ვაქცინირების დროს მიღებული ბილეთი ვალიდურია ყველა გათამაშების განმავლობაში, მანამდე სანამ ბილეთზე არ დაფიქსირდება მოგება. მაგ: თუ მოქალაქის ბილეთმა ერთხელ გაიმარჯვა ყოველდღიურ გათამაშებაში, თქვენი ბილეთი აღარ მონაწილოებს მომდევნო ყოველდღიურ გათამაშებაში, მაგრამ მიიღებს მონაწილეობას ყოველკვირეულ და შემაჯამებელ გათამაშებებში, თუ ბილეთმა მოიგო ყოველკვირეულ გათამაშებაში, ის შემდგომში მონაწილეობას მიიღებს შემაჯამებელ გათამაშებაში.

რაც უფრო მალე ჩაიტარებს ადამიანი ვაქცინაციას, მით უფრო ბევრ გათამაშებაში მიიღებს მისი ლატარიის ბილეთი მონაწილეობას და მით უფრო გაიზრდება მისი მოგების შანსი.

StopCovid ლატარიის „აიცერი და მოიგეს“’ ლატარიაში მოგების შესახებ ინფორმაციას მომხმარებელი მიიღებს რეგისტრაციის დროს მითითებულ მობილურ ნომერზე, მოგების იდენტიფიცირება მოხდება ასევე პირველი რეგისტრაციის დროს NCDC-ის ბაზაში მინიჭებული საიდენტიფიკაციო კოდის მიხედვით. გათამაშებების ტრანსლირება და შედეგების ნახვა შესაძლებელია საიტზე: www.stopcov.lotto.ge-ზე.

18 წლამდე აცრილი პირის ლატარიის ბილეთი გადაეცემა მშობელს, მეურვეს ან ოჯახის სრულწლოვან წევრს.

StopCovid ლატარიის „აიცერი და მოიგეს’“ 1 000 ლარამდე მოგების განაღდება შესაძლებელია „საქართველოს ეროვნული ლატარიის“ სერვის-ცენტრებში, რომლებიც განლაგებულია ყველა მსხვილ სავაჭრო მოლში მთელი საქართველოს მასშტაბით, ხოლო 1 000 ლარზე მეტის მოგების შემთხვევაში მოგებულს თანხა ჩაერიცხება მის პირად საბანკო ანგარიშზე. ლატარიის „აიცერი და მოიგეს“ ჩატარების მიზანია ვაქცინაციის პროცესის ხელშეწყობა, ვაქცინირებული ადამიანების რაოდენობის, ვაქცინაციის პროცესისადმი ლოიალურობისა და სანდოობის გაზრდა“, - აღნიშნულია საქართველოს ეროვნული ლატარიის მიერ გავრცელებულ განცხადებაში.

აღნიშნული ინფორმაციის გავრცელების შემდეგ, საზოგადოებაში განსხვავებული ინტერპრეტაციით იქნა აღქმული უკვე ვაქცინირებული პირების ლატარიაში ჩართვის საკითხი. დამატებითი დეტალების გასარკვევად GMnews საქართველოს ეროვნული ლატარიის კომპანიას დაუკავშიერდა, სადაც განმარტეს, რომ გათამაშებაში ჩაერთვება ყველა ის პირი, ვისაც საქართველოში კოვიდსაწინააღმდეგო ვაქცინაციის დაწყების დღიდან ამ დრომდე აცრა აქვს ჩატარებული, იქნება ეს ერთი თუ ორივე დოზა. რაც შეეხება უკვე ვაქცინირებული პირების იდენტიფიცირებას, ლატარიის კომპანიის ცნობით, ყველა აცრილი პირი ავტომატურად ჩაერთვება გათამაშებაში და სმს მიიღებს მითითებულ ტელეფონის ნომერზე.