საინფორმაციო კამპანია სამდღიანია და გორის გარდა, შეხვედრები თელავსა და ქუთაისშიც მოეწყობა. როგორც ცნობილია, ზემოხსენებული კამპანიის მიზანი ბავშვთა მიმართ ძალადობის ფორმებზე მოქალაქეების ინფორმირებაა.

ღონისძიების ორგანიზატორების თქმით, მოეწყობა თეატრალიზებული მონოლოგები და დისკუსიები, რომელიც თვალსაჩინოს გახდის იმ უარყოფით შედეგებს, რასაც ბავშვები საბავშვო ბაღში, სკოლაში, თუ ოჯახში განცდილი ძალადობის შედეგად იღებენ. ამასთან, გაიმართება თემატური პერფორმანსები და გამოფენები.

კამპანიას ორგანიზება გაუწია რამდენიმე არასამთავრობო ორგანიზაციამ: „კოალიცია ბავშვებისა და ახალგაზრდებისათვის“, „სიდა“, „სამოქალაქო საზოგადოების რეგიონული ქსელი“ (R-CSN), „დემოკრატიული ჩართულობის ცენტრების ქსელი“ (NCCE), საზოგადოება „ბილიკი“, „სოციალური ქოლგა“, პროექტი PITA. კამპანიის ფინანსური უზრუნველყოფა აშშ-ის საერთაშორისო განვითარების სააგენტოს (USAID), აღმოსავლეთ-დასავლეთის მართვის ინსტიტუტის (EWMI) ACCESS-ის პროექტისა და Save the Children-ის მიერ განხორციელდა.