ფრაქცია „ქართული ოცნება დემოკრატიული საქართველოს“ სახელით, ბიუჯეტის პროექტთან დაკავშირებით გარკვეული რეკომენდაციები გაჟღერდა. „ჩვენგან დასახელებულ შენიშვნებში ძირითადად იმ თემებისა და პრობლემების მოგვარება იყო ჩადებული, რომელიც ვთვლით რომ პრიორიტეტულია, ეს ეხება სასმელ წყალს, სკოლამდელ განათლებას. ამასთან, მერიას შევთავაზებთ, რომ რიგ მუხლებს თანხის რაღაც ნაწილი მოაკლდეს და ამ პრიორიტეტული მიმართულებებისკენ მიიმართოს. არ ვამბობთ, რომ პროექტში ასახული ინფრასტრუქტურული პროექტები მნიშვნელოვანი არ არის, პირიქით, ყველა მათგანი მოსაგვარებელია, მაგრამ მნიშვნელოვანია, რომ შემოსულობების გათვალისწინებით სწორად გავანაწილოთ ბიუჯეტი“, - აღნიშნა GMnews-თან საუბრისას გორის მუნიციპალიტეტის საკრებულოს თავმჯდომარის მოადგილემ მარლენ ნადირაძემ.

შეგახსნებთ, რომ გორის მუნიციპალიტეტის საკრებულო, ბიუჯეტის პროექტთან დაკავშირებულ რეკომენდაციებს, გორის მერიას 25 ნოემბრამდე გადაუგზავნის. მერი კი, დაკორექტირებულ დოკუმენტს საკრებულოს დაუბრუნებს. ადგილობრივი ბიუჯეტის დამტკიცების საკითხზე კი, საკრებულოს წევრები, დაახლოებით, 15 დეკემბრისთვის იმსჯელებენ.