საოკუპაციო ხაზთან დაკავებული ექიმის, ვაჟა გაფრინდაშვილის მხარდასაჭერად და მისი გათავისუფლების მოთხოვნით ექიმები აქციას აანონსებენ. საქართველოს სხვადასხვა სამედიცინო დაწესებულებებს ,,გორმედის" ქსელიც უერთდება. სამედიცინო დაწესებულებამ განცხადება ცოტა ხნის წინ გაავრცელა.

,,თავისუფლება ვაჟა გაფრინდაშვილს! ორშაბათს, 18 ნოემბერს, 12 საათზე, ,,გორმედის“ ქსელის კლინიკების - გორის საუნივერსიტეტო კლინიკის, დედათა და ბავშვთა სამედიცინო ცენტრ ,,იავნანას“, ქარელის ცენტრალური საავადმყოფოს და ხაშურის კლინიკური საავადმყოფოს მედპერსონალი თეთრხალათიანთა აქციას უერთება და სამედიცინო დაწესებულებების წინ 5 წუთის განმავლობაში, ყველა ერთად დგომით, პროტესტს გამოხატავს საოკუპაციო ხაზთან ცნობილი ექიმის უკანონოდ დაკავების გამო და ყველა ერთად მოითხოვს ცნობილი ქართველი ექიმის, ტრავმატოლოგ-ორთოპედის გათავისუფლებას ცხინვალის საპატიმროდან", - აღნიშნულია ,,გორმედის" ადმინისტრაციის განცხადებაში.
საოკუპაციო ხაზთან დაკავებული ცნობილი ექიმის, ვაჟა გაფრინდაშვილის მიმართ დე ფაქტო რეჟიმის წარმომადგენლებმა სისხლის სამართლის საქმე აღძრეს. თბილისის ცენტრალური საავადმყოფოს ორთოპედ-ტრავმატოლოგს ე.წ. საზღვრის უკანონო კვეთას ედავებიან. დე ფაქტო რეჟიმის  წარმომადგენლების განცხადებით, გაფრინდაშვილმა მიზანმიმართულად გადაკვეთა ე.წ. სახელმწიფო საზღვარი.