კონფლიქტები
13.07.2021 11:27
დღევანდელი შეხვედრის მთვარ საკითხს წარმოადგენს ჩვენი თანამოქალაქეების - ზაზა გახელაძის და გენადი ბესტაევის საკითხი - ირაკლი ანთაძე
ინციდენტების პრევენციისა და მათზე რეაგირების მექანიზმის ფორმატში ერგნეთში რიგით 101-ე შეხვედრა მიმდინარეობს. შეხვედრის დაწყებამდე კომენტარი გააკეთა სახელმწიფო უსაფრთხოების სამსახურის საინფორმაციო-ანალიტიკური დეპარტამენტის ხელმძღვანელის მოადგილემ. ირაკლი ანთაძის განცხადებით, რიგით 101-ე შეხვედრის საკვანძო საკითხს წარმოადგენს ზაზა გახელაძის და გენადი ბესტაევის გათავისუფლების საკითხი.
,,დღევანდელი შეხვედრის მთვარ საკითხს, საკვანძო საკითხს წარმოადგენს ჩვენი თანამოქალაქეების - ზაზა გახელაძის და გენადი ბესტაევის საკითხი, რათა ისინი უმოკლეს ვადაში დაუბრუნდნენ საკუთარ ოჯახებს. პროცესს აქვს დინამიკა, ამ საკითხზე მუშაობა მიმდინარეობს არა მხოლოდ შეხვედრებზე, არამედ ყოველდღიურ რეჟიმში, შესაბამისად, პროცესში არის გარკვეული დინამიკა, რიგი მიზეზების გათვალისწინებით, მე თავს შევიკავებ დეტალებზე საუბრისგან. როგორც აღვნიშნე, დღევანდელ შეხვედრაზეც ეს საკითხი იქნება აქტიური განხილვის საგანი.
შეხვედრაზე, ასევე, საუბარი შეეხება წინა შეხვედრიდან დღემდე, პრაქტიკულად ერთი თვის განმავლობაში, საოკუპაციო ხაზის გასწვრივ დაფიქსირებულ ყველა მნიშვნელოვან ინციდენტს, მათ შორის, აქტიურ ფაზაში მიმდინარე ე.წ. ბორდერიზაციის უკანონო პროცესს“, - განაცხადა ირაკლი ანთაძემ.
