აცრების დაჯავშნის ელექტრონული პორტალი აღდგენილია.

დაავადებათა კონტროლისა და საზოგადოებრივი ჯანმრთელობის ეროვნული ცენტრი მოუწოდებს მოქალაქეებს, დროულად იზრუნონ Covid-19 საწინააღმდეგო ვაქცინით აცრის ჯავშნის რეგისტრაციაზე მათთვის სასურველ სამედიცინო დაწესებულებაში.

ამ დროისთვის, ვაქცინაციის რეგისტრაცია გორში შესაძლებელია მხოლოდ სამხედრო ჰოსპიტალში, სადაც ამ დროის მონაცემებით მხოლოდ 2 თავისუფალი ადგილია დარჩენილი.

რაც შეეხება კასპს, ვაქცინაციის კაბინეტი მოქმედებს შპს ,,მედალფას“ კასპის კლინიკაში, სადაც ამ ეტაპზე ვიზიტის დაჯავშნა შეგიძლიათ 6-15 ივლისის ჩათვლით, ხაშურში კი - შპს ,,ახალ კლინიკაში“, სადაც ვიზიტის დაჯავშნა შესაძლებელია 6-17 ივლისის თარიღებში. კასპსა და ხაშურში ვაქცინაციის დასაჯავშნად თავისუფალი ადგილები არის.

შეგახსენებთ, საქართველოს ჯანდაცვის სამინისტროს ინფორმაციით, 3 ივლისს, ვაქცინაციისთვის რეგისტრაციის პორტალზე - booking.moh.gov.ge მასირებული კიბერშეტევა განხორციელდა.

ვაქცინაციის პორტალ booking.moh.gov.ge-ზე კიბერშეტევის ფაქტზე გამოძიება ორი მუხლით დაიწყო. შსს-ს ცნობით, გამოძიება კომპიუტერული მონაცემის ანდა კომპიუტერული სისტემის უკანონოდ გამოყენებისა და ხელყოფის ფაქტზე საქართველოს სისხლის სამართლის კოდექსის 285-ე და 286-ე მუხლებით მიმდინარეობს.

პორტალი https://booking.moh.gov.ge/Hmis/Hmis.Queue.Web/#/.