ჯანდაცვის მინისტრის მოადგილე თამარ გაბუნია არ გამორიცხავს, რომ ვაქცინაციის პროცესში ჩართვის შესაძლებლობა ახალ ჯგუფს - 55 წლის ზემოთ ასაკის მოქალაქეებსაც მისცენ.

გაბუნიას თქმით, ვაქცინაციის მსურველთა დაბალი აქტივობის შემთხვევაში, ჯანდაცვის სამინისტრო, ვაქცინაციის პროცესში დამატებითი ჯგუფების მოცვაზეც იფიქრებს.

„ჩვენთვის მთვარია, რომ ვაქცინის ის რაოდენობა, რომელიც მივიღეთ და ძვირფასია, მიზნობრივად გამოვიყენოთ. თუ აქტივობა დაბალი იქნება, ვიფიქრებთ შემდეგი ჯგუფის მოცვაზე. ვფიქრობ, რომ პირველ ეტაპზე მაქსიმალურად მოხერხდება ასაკობრივი ჯგუფების და სამედიცინო პერსონალის მოცვა იმ მასშტაბით, რაც გვქონდა თავიდანვე დაგეგმილი. შემდეგ, როცა დამატებითი დოზები გაჩნდება აპრილიდან და მაისიდან, რა თქმა უნდა, ვფიქრობ, რომ 55 წლის ზემოთ და სხვა ჯგუფები ავცრათ. მეორე კვარტლის ბოლოა მითითებული იმისთვის, რომ არარისკჯგუფის მოსახლეობა მოხვდეს ვაქცინაციის პროგრამაში. მესამე და მეოთხე კვარტალი იყო დაგეგმილი ფართო ვაქცინაციისთვის“, - განაცხადა გაბუნიამ.