GMnews დაინტერესდა, რა ფორმით გაგრძელდება სასწავლო პროცესი გორის მუნიციპალიტეტის სოფლების სკოლებში. როგორც GMnews-ს გორის საგანმანათლებლო რესურსცენტრის ხელმძღვანელმა, ნანა ტერმაკოზაშვილმა განუცხადა, მთავრობის გადაწყვეტილება მხოლოდ ქალაქის საჯარო სკოლებზე (ასევე კერძო სკოლებზე) ვრცელდება და სოფლად არსებული ზოგადსაგანმანათლებლო დაწესებულებები სწავლას ჩვეულებრივ, საკლასო ოთახებში განაგრძობენ. ბუნებრივია იმ გამონაკლისების გარდა, როცა სკოლაში ვირუსი ფიქსირდება (ასეთ შემთხვევაში, ეპიდსიტუაციის გათვალისწინებით, თვითიზოლაციაში გადადის კონკრეტული კლასი, ან მთლიანად სასწავლო დაწესებულება).

შეგახსენებთ, რომ უწყებათაშორისი საკოორდინაციო საბჭოს გადაწყვეტილებით, ქვეყანაში არსებული ეპიდემიოლოგიური მდგომარეობიდან გამომდინარე, ხვალიდან, 28 ნოემბრიდან, 31 იანვრის ჩათვლით, ქვეყნის მასშტაბით დამატებითი შეზღუდვები ამოქმედდება.