გორის სახელმწიფო სასწავლო უნივერსიტეტში სწავლა 21 სექტემბერს ონლაინ რეჟიმში განახლდება - ინფორმაციას აღნიშნულის შესახებ უმაღლესი სასწავლებლის ადმინისტრაცია ავრცელებს.

როგორც გორის უნივერსიტეტის ოფიციალურ გვერდზე განთავსებულ ინფორმაციაშია მითითებული, სასწავლო პროცესი უნივერსიტეტის ვებ-გვერდზე გამოქვეყნებული ცხრილის შესაბამისად წარიმართება.

„სასწავლო პროცესის თანმიმდევრულად და შეუფერხებლად წარმართვის მიზნით, საჭიროა სტუდენტებმა ყველა სასწავლო კურსის წამყვან პროფესორ-მასწავლებელს მიაწოდონ საკუთარი ელ-ფოსტა. ამასთან, განვმარტავთ, რომ ონლაინ სწავლისთვის სტუდენტებს დაჭირდებათ: ინტერნეტში ჩართული ნებისმიერი ტიპის კომპიუტერი ან ტელეფონი, მიკროფონით და კამერით“, - აცხადებენ გორის სახელმწიფო სასწავლო უნივერსიტეტში.

რაც შეეხება ინსტრუქციას, თუ როგორ უნდა ჩაერთონ ონლაინ სწავლებაში სტუდენტები, გამოქვეყნებულია უნივერსიტეტის ვებ და ფეისბუკ გვერდებზე.