კულტურული მემკვიდრეობის ძეგლთა სიაში შეტანილ ობიექტზე (სურამის ციხეზე) მიმდინარე წინასარეაბილიტაციო სამუშაოები კულტურული მემკვიდრეობის დაცვის ეროვნული სააგენტოს გენერალურმა დირექტორმა, შიდა ქართლის გუბერნატორთან და ადგილობრივი ხელისუფლების სხვა წარმომადგენლებთან ერთად მოინახულა, სადაც მხარეებმა დაგეგმილი აქტივობების შესახებ ინფორმაციები გაცვალეს.

„სურამის ციხეზე არქეოლოგიური და შემდგომ - სარეაბილიტაციო სამუშაოების დაწყება, შიდა ქართლის რეგიონის ტურისტული პოტენციალის გაზრდისთვის წინ გადადგმული ნაბიჯია. ჩვენ ჯერ კიდევ თებერვალში დავგეგმეთ სურამის ციხეზე განსახორციელებელი სამუშაოები. დაბა საკურორტო ზონაა, ამიტომ მისი განვითარებისთვის საჭიროა აქ არსებული ისტორიული და კულტურული ობიექტების მოწესრიგება. პროექტი რამდენიმე ეტაპს მოიცავს, რომლის დასრულების შემდგომ ადგილობრივი და უცხოელი ტურისტები განახლებული ინფრასტრუქტურით ისარგებლებენ“, - აღნიშნა შიდა ქართლის გუბერნატორმა, გიორგი ხოჯევანიშვილმა.