საზოგადოება
03.07.2020 19:05
სოფელ ხიდისთავში სასმელი წყლის სისტემა მოეწყობა
სასმელი წყლის განახლებული სისტემის მოწყობა იგეგმება სოფელ ხიდისთავში. შესაბამისი პროექტი უკვე მზადაა და სამუშაოების შესყიდვაზე მერიამ ტენდერიც გამოაცხადა.
„სამუშაოების შესყიდვის სავარაუდო ღირებულება 1 888 150 ლარია. ტენდერების ელექტრონულ სისტემაში შესაბამისი წინადადებების მიღება 16 ივლისს დაიწყება. პროექტის მიხედვით, ტენდერში გამარჯვებულ კომპანიას დაევალება სოფელ ხიდისთავში რკინა-ბეტონის ახალი წყალმიმღებისა და შიდაგამანაწილებელი ქსელის მოწყობა ინდივიდუალური მრიცხველებით“, - ნათქვამია გორის მუნიციპალიტეტის მერიის პრესსამსახურის მიერ გავრცელებულ ინფორმაციაში.
ცნობისთვის, სოფელი ხიდისთავი ამჟამად სასმელი წყლით ატენის ტერიტორიაზე არსებული სათავე ნაგებობიდან მარაგდება. სოფელს, სადაც 1300 ოჯახი და 4000 მოსახლე ცხოვრობს, სასმელი წყლის პრობლემა წლებია აწუხებს.
