„ეპიდემიური მდგომარეობის მიზეზით გამოწვეული ხანგრძლივი პაუზის შემდეგ, აღნიშნული მუზეუმ-ნაკრძალების ადმინისტრაციები ვიზიტორთა მომსახურებას ჯანმრთელობის დაცვის უწყებების მიერ წინასწარ შემუშავებული რეგულაციებით განახორციელებენ. დადგენილი ქცევის ნორმების დაცვა დამთვალიერებლებისთვის სავალდებულო იქნება. რაც შეეხება ტარიფების გადახედვას, ამ ეტაპზე, 15-დან 7 ლარამდე შევამცირეთ უფლისციხისა და ვარძიის ღია მუზეუმების ბილეთის ფასი.

კვლავ 1 ლარი იქნება ბილეთის საფასური საქართველოს მოქალაქე მოსწავლეების, სტუდენტებისა და პენსიონრებისთვის. მუზეუმ-ნაკრძალებში უფასოდ დაიშვებიან იძულებით გადაადგილებული პირები, ომის ვეტერანები, მზრუნველობას მოკლებული ბავშვები და სოციალურად დაუცველი პირის სტატუსის მქონე მოქალაქეები. საფასურის გადახდა არ შეეხებათ არც შეზღუდული შესაძლებლობის მქონე პირებს და მათ თანმხლებ მოქალაქეებს. შეზღუდვების მოხსნის გადაწყვეტილების მიღებიდან მომდევნო 3 თვის განმავლობაში ბილეთების ფასი შემცირდება სხვა ობიექტებშიც. ახალი ტარიფები გახსნის თარიღის განსაზღვრისთანავე დადგინდება“ - ნათქვამია კულტურული მემკვიდრეობის ეროვნული სააგენტოს მიერ გავრცელებულ განცხადებაში.