გორის მუნიციპალიტეტის ტერიტორიაზე მცხოვრებ ხუთ და მეტშვილიან ოჯახებს დახმარების სახით ფქვილი გადაეცათ. სოციალური პასუხისმგებლობის ფარგლებში, ქველმოქმედებისთვის გაღებული პროდუქტი ადგილობრივმა თვითმმართველობამ ორმოცდათხუთმეტ ოჯახზე გადაანაწილა.
„გორის მუნიციპალიტეტის მერია, როგორც საკუთარი სახსრებით, ისე ქველმოქმედი ადამიანების დახმარებით ცდილობს, როგორც რაიონში, ისე ქალაქში მცხოვრებ ეკონომიკურად გაჭირებულ მოსახლეობას დაუდგეს გვერდში. ერთ-ერთი ასეთი აქცია ადგილობრივი ბიზნესმენების - გივი აბალაკისა და არჩილ მოგელაშვილის დახმარებით განვახორციელეთ. მერის წარმომადგენლებმა, მათ მიერ გაღებული საჩუქარი ოჯახებს სახლებში მიუტანეს“, - აღნიშნა გორის მუნიციპალიტეტის მერიის ჯანმრთელობის დაცვისა და სოციალური დახმარების სამსახურის ხელმძღვანელმა, დავით ჩიხრაძემ.