იმედი გვაქვს, არ მივალთ ინფიცირებულების იმ რაოდენობასა და გავრცელების ისეთ სისწრაფეზე, როდესაც სრული კარანტინის გამოცხადება მოგვიწევს. თუმცა, ამასაც არ გამოვრიცხავ, - ამის შესახებ პრემიერ-მინისტრმა გიორგი გახარიამ დღეს გამართულ პრესკონფერენციაზე განაცხადა. მისი თქმით, 24- საათიანი სრული კარანტინის გამოცხადების თაობაზე გადაწყვეტილება იმის მიხედვით იქნება მიღებული, თუ რამდენად გაიზრდება კორონავირუსით ინფიცირებულთა რიცხვი და შეძლებს თუ არა, ჯანდაცვის სისტემა ინფიცირებულა საერთო რაოდენობის ერთდროულად მიღებას.

„ჩვენთვის ახლა ყველაზე მნიშვენლოვანია ინფექციის განვითარების სისწრაფე. ყველაფერს, რასაც ახლა ვაკეთებთ, იმისთვის არის, რომ ამ სისწრაფის რეგულირება მოვახდინოთ. მინდა კიდევ ერთხელ ხაზგასმით აღვნიშნო, იმდენად მცირეა მონაცემები და ფუნდამენტური კვლევები ამ ვირუსის გავრცელებასთან დაკავშირებით, ყველაფერი შეიძლება არასერიოზულ პროგნოზებად ჩაითვალოს.

იმედი გვაქვს, არ მივალთ ინფიცირებულების იმ რაოდენობაზე და გავრცელების ისეთ სისწრაფეზე, როდესაც სრული კარანტინის გამოცხადება მოგვიწევს. თუმცა, ამას არ გამოვრიცხავ. ყველაფერი დამოკიდებულია ორ რამეზე. პირველი, ჩვენი ჯანდაცვის სისტემის მზაობაზე, რაოდენობრივად რამდენ ინფიცირებულს შეუძლია ერთდროულად მოემსახუროს და მეორე, რა სისწრაფით ვრცელდება ვირუსი. ეს ჩვენთვის დღეს ორი კრიტიკულად მნიშვნელოვანი მდგენელია. ამ მდგენელების განვითარებიდან გამომდინარე, მიღებული იქნება ესა თუ ის გადაწყვეტილება, მათ შორის 24- საათიანი სრული კარანტინის გამოცხადების თაობაზე“, - განაცხადა პრემიერმა.