„მე, როგორც უწყების ხელმძღვანელს, გამიჩნდა გრძნობა, რომ ზოგიერთი სანოტარო ბიუროს ფუნქციონირება წინააღმდეგობაში იყო უწყებათაშორისი საბჭოს მიერ გაცემულ რეკომენდაციებთან. ბოლო დღეებში კი, დამრჩა შთაბეჭდილება, რომ ზოგიერთ ნოტარიუსს გაუჭირდა ფეხი აეწყო საფრთხისთვის, რომლის წინაშეც დგას ჩვენი ქვეყანა. შესაბამისად, მივიღე გადაწყვეტილება, რომ დღეს ყველა სანოტარო ბიურო საქართველოში დაიკეტოს. დღეიდან, ასევე დაიკეტება რეესტრებისა და იუსტიციის სახლების ყველა ფრონტ-ოფისი, მაგრამ სერვისების გაცემა უნდა გაგრძელდეს, მათ შორის სანოტარო მომსახურებისა. დაგვჭირდება ორი დღე, რომ შევიმუშავოთ და გამოვაქვეყნოთ ის პირობები, რომელშიც რეესტრები გააგრძელებენ შეძლებისდაგვარად მუშაობას, რომ მოქალაქეებმა მიიღონ სასიცოცხლოდ მნიშვნელოვანი სერვისები. მომდევნო დღეებში გამოქვეყნდება ის ლოკაციები, რა თქმა უნდა, ძალიან შეზღუდული ოდენობით, სადაც შესაძლებელი იქნება სანოტარო მომსახურების მიღება და გამოქვეყნდება იმ ფრონტ-ოფისების ფილიალების სია, რომელიც მოსახლეობას გაუწევს მომსახურებას“, - განაცხადა თეა წულუკიანმა.