საქართველო „ადგილწარმოშობის დასახელებებისა და გეოგრაფიული აღნიშვნების შესახებ ლისაბონის შეთანხმების ჟენევის აქტს“ (ჟენევის აქტი) შეუერთდა, - აღნიშნულის შესახებ ინფორმაციას საქართველოს ინტელექტუალური საკუთრების ეროვნული ცენტრი ავრცელებს.

საქპატენტის ინფორმაციით, აქტის რატიფიცირებას საქართველოს პარლამენტმა 2025 წლის 18 მარტს დაუჭირა მხარი. შედეგად, ქართული უნიკალური პროდუქტების დაცვის არეალი მნიშვნელოვნად გაფართოვდა და მოიცვა ჟენევის აქტის შემკვრელი 23 სახელმწიფო და 2 მთავრობათაშორისი ორგანიზაცია - ევროკავშირი და აფრიკის ინტელექტუალური საკუთრების უწყება.

„ჟენევის აქტთან შეერთებას წინ უძღოდა საქართველოს ინტელექტუალური საკუთრების ეროვნული ცენტრის - საქპატენტის მიერ განხორციელებული რეფორმა. კერძოდ, მომზადდა „საქონლის ადგილწარმოშობის დასახელებისა და გეოგრაფიული აღნიშვნის შესახებ“ საქართველოს კანონის პროექტი, რომელიც საქართველოს პარლამენტმა 2023 წლის 21 სექტემბერს მიიღო. აღნიშნულმა კანონმა განსხვავებულად დაარეგულირა გეოგრაფიული აღნიშვნებისა და ადგილწარმოშობის დასახელებების რეგისტრაციის პროცედურა, კერძოდ, საქპატენტთან ერთად, ადგილწარმოშობის დასახელებისა და გეოგრაფიული აღნიშვნის განმხილველ ეროვნულ კომისიას მიეცა პროცესში ჩართვის შესაძლებლობა. გარდა ამისა, მეწარმეთა გაერთიანებების ფუნქციების გაზრდით, კანონმა ხელი შეუწყო მათ გაძლიერებას. საერთაშორისო პრაქტიკის შესაბამისად, ასევე, ჩამოაყალიბა საქონლის ადგილწარმოშობის დასახელებების და გეოგრაფიული აღნიშვნებით ნიშანდებული პროდუქტის კონტროლის სისტემაც.

უნდა აღინიშნოს, რომ გეოგრაფიული აღნიშვნა და ადგილწარმოშობის დასახელება მომხმარებელს აწვდის ინფორმაციას კონკრეტული პროდუქტის წარმომავლობასა და იმ უნიკალურ მახასიათებლებზე, რომლებიც დაკავშირებულია მის წარმოშობის ადგილთან, იქ არსებულ გარემო პირობებთან, ასევე, ადგილობრივ მოსახლეობაში გავრცელებულ წარმოების ტრადიციულ ცოდნასთან, რაც, საბოლოო ჯამში, ხდის თითოეულ ასეთ პროდუქტს გამორჩეულს და უნიკალურს.

დღეის მდგომარეობით საქართველოში რეგისტრირებულია 39 ადგილწარმოშობის დასახელება და 31 გეოგრაფიული აღნიშვნა. მათ შორისაა, მაგალითად, ღვინის ადგილწარმოშობის დასახელებები: ხვანჭკარა, წინანდალი, ახაშენი; მინერალური წყლები: ნაბეღლავი, საირმე, ბორჯომი; გეოგრაფიული აღნიშვნები: გორის ვაშლი, ქვევრი, ჭაჭა, ჩურჩხელა, სულგუნი და სხვა. ჟენევის აქტთან მიერთებით კი საქართველოს გაუჩნდა შესაძლებლობა, გამართული და მოქნილი საერთაშორისო სამართლებრივი მექანიზმის საშუალებით დაიცვას როგორც რეგისტრირებული ადგილწარმოშობის დასახელებები, ისე გეოგრაფიული აღნიშვნები“, - ნათქვამია საქსტატის მიერ გავრცელებულ ინფორმაციაში.