საქართველოს სახელმწიფო უსაფრთხოების სამსახურის უფროსის თანამდებობაზე საქართველოს პარლამენტს იუსტიციის მინისტრის, ანრი ოხანაშვილის კანდიდატურას წარვუდგენთ, - ამის შესახებ პრემიერმა მთავრობის ადმინისტრაციაში გამართულ ბრიფინგზე განაცხადა.

როგორც ირაკლი კობახიძემ აღნიშნა, საქართველოს პარლამენტში ოხანაშვილის კანდიდატურის დამტკიცებას მიმდინარე კვირის ბოლო სამუშაო დღეს - პარასკევს ეყრება კენჭი.

შეგახსენებთ, სახელმწიფო უსაფრთხოების სამსახურის უფროსი გრიგოლ ლილუაშვილი თანამდებობას ტოვებს და როგორც პრემიერ მინისტრმა განაცხადა, რეგიონული განვითარების მინისტრად დაინიშნება.

ლილუაშვილს ოქტომბერში ეწურებოდა უფლებამოსილების ვადა და შესაბამისად, აღნიშნული თანამდებობა ისედაც უნდა დაეტოვებინა.

რაც შეეხება ანრი ოხანაშვილს, რომელიც ამჟამად იუსტუციის მინისტრის პოსტს იკავებს, ოხანაშვილი წლების მანძილზე იყო საქართველოს პარლამენტის წევრი და იურიდიულ საკითხთა კომიტეტის თავმჯდომარე. ოხანაშვილი სამართლის დოქტორია. მას სადოქტორო დისერტაცია დაცული აქვს გერმანიაში, ბერლინის ჰუმბოლდტის უნივერსიტეტში.