2025 წლის რეგისტრაცია ერთიანი ეროვნული გამოცდებისთვის, საერთო სამაგისტრო გამოცდისთვის, ასევე, სტუდენტთა საგრანტო კონკურსისთვის დღეს, 2 აპრილის 18:00 საათზე დასრულდება.

შეფასებისა და გამოცდების ეროვნული ცენტრის დირექტორის, ნინო წერეთელის თქმით, წელსაც, ცენტრის მთავარი რჩევა გამოსაცდელებისთვის ისაა, რომ დეტალურად გაეცნონ რეგისტრაციის ინსტრუქციას და განსაკუთრებული ყურადღება მიაქციონ თარიღებს.

„გამოსაცდელებისთვის, ამ მხრივ, წელს გვაქვს მცირე, თუმცა, მათთვის მნიშვნელოვანი სიახლე - იმ შემთხვევაში, თუ ისინი გამოცდებზე რეგისტრაციის საფასურს გადაიხდიან 2 აპრილის 18:00 საათამდე, მაგრამ რაიმე მიზეზით ვერ მიიყვანენ რეგისტრაციის პროცესს ბოლომდე, მათ შესაძლებლობა ექნებათ, 10 აპრილის 18:00 საათამდე დაასრულონ რეგისტრაცია“, - აღნიშნა წილოსანმა.

რაც შეეხება რეგისტრაციას, ერთიან ეროვნულ გამოცდებზე რეგისტრაციის პროცესი წელსაც რამდენიმეეტაპიანია და რეგიტრაციის გავლა შესაძლებელია ვებგვერდზე: online. naec. ge

ძირითად ეტაპზე - 2 აპრილის 18:00 საათამდე გამოსაცდელმა უნდა გადაიხადოს რეგისტრაციის საფასური და შეავსოს პირადი მონაცემები, აირჩიოს საგამოცდო ქალაქი, ჩასაბარებელი საგნები. საგნის შეცვლა ან დამატება, ასევე, გამოცდის ენის შეცვლა აბიტურიენტებს 10 აპრილის 18:00 საათამდე შეეძლებათ. ამ დრომდე ექნებათ მათ საგამოცდო ქალაქის შეცვლის შესაძლებლობაც.

დარეგისტრირებულ აბიტურიენტებს არაერთხელ შეეძლებათ შეცვალონ საგანმანათლებლო პროგრამების პრიორიტეტული ჩამონათვალი. მათი არჩევის, წაშლის და გადანაცვლების საშუალება გამოსაცდელებს აპელაციების შედეგების გამოქვეყნებიდან მომდევნო დღის ჩათვლით ექნებათ. კონკრეტული თარიღი კი გამოქვეყნდება ვებგვერდზე www. naec. ge.

„აბიტურიენტთა მეტი ინფორმირებულობის მიზნით, 2025 წელსაც გაიმართება საინფორმაციო შეხვედრები გამოსაცდელებისთვის როგორც პირისპირ, ასევე, ონლაინ რეჟიმში. დეტალური ინფორმაცია შეფასებისა და გამოცდების ეროვნული ცენტრის ვებ და ფეისბუქ გვერდებზე გამოქვეყნდება.

გაითვალისწინეთ, რომ სკოლის მოსწავლეები, რომლებიც არ სწავლობენ დამამთავრებელ კლასში, 2025 წლის ერთიან ეროვნულ გამოცდებზე არ დაიშვებიან. ცენტრი განიხილავს მომდევნო წელს არადამამთავრებელი კლასის მოსწავლეებისთვის ალტერნატიული პროექტის შეთავაზების შესაძლებლობას“, - აცხადებენ შეფასებისა და გამოცდების ეროვნულ ცენტრში.