27 მარტი თეატრის საერთაშორისო დღეა. თარიღი 1961 წლიდან, მსოფლიოს მასშტაბით მას შემდეგ აღინიშნება, რაც თეატრის საერთაშორისო ინსტიტუტის IX კონგრესის დელეგატები გამოვიდნენ ინიციატივით და ღია წერილით მიმართეს თეატრის მოღვაწეებს, წელიწადში ერთხელ თეატრალთა პროფესიული დღესასწაული ეზეიმათ.

ამ დღეს სხვადასხვა ქვეყანაში ტარდება თეატრალური ფესტივალები, იმართება პრემიერები, ეწყობა გამოფენები, სადღესასწაულო დადგმები და შეხვედრები მსახიობებთან.

„სოფოკლეს, ესქილეს, შექსპირის, დიუმა, მოლიერის, და სხვა გენიოსების ქვეყნებთან ერთად, საქართველოც ზეიმობს ამ გრანდიოზულ დღეს. თეატრის დაბადებით კაცობრიობა ხელოვნების უსაზღვრო სიყვარულით შეიმოსა, პირველადქმნილი თეატრალური სანახაობიდან მოყოლებული-დღევანდელობამდე.

თეატრია მაღალი ზნეობრივი იდეალებით ეპოქალური მაჯისცემის გამოხატულებით, ყველაზე უძველესი და ყველაზე საპატიო რამ, სადაც ხელოვნების ყველა სფერო ჰარმონიულადაა შერწყმული ერთ მთლიანობაში. ასე იყო ძველ ბერძნულ, რომაულ თეატრებში და უფლისციხის თეატრონშიც. დღეს ეს თეატრი ამაყად ეგებება ოცდამეერთე საუკუნის გაზაფხულის უმშვენიერეს დღეს.

გ. ერისთავის სახელობის თეატრის შემოქმედებითი კოლექტივი გილოცავთ თეატრის საერთაშორისო დღეს“, - აღნიშნულია გორის თეატრის გავრცელებულ მიმართვაში.