ცესკომ და სწავლების ცენტრმა საქართველოს საჯარო სკოლებში მასშტაბური სასწავლო პროექტი - „არჩევნები და ახალგაზრდა ამომრჩეველი“ განახორციელა.

პროექტი საქართველოს 64 მუნიციპალიტეტში, მათ შორის, გორის საჯარო სკოლებში, ასევე, ეთნიკური უმცირესობებით კომპაქტურად დასახლებულ მუნიციპალიტეტებში განხორციელდა და ქვეყნის მასშტაბით 360 საჯარო სკოლის 7604 მოსწავლე იყო ჩართული.

XI-XII კლასის მოსწავლეებმა არაერთ მნიშვნელოვან საკითხზე, როგორიცაა არჩევნების არსი ქვეყნის დემოკრატიული განვითარების პროცესში და ამომრჩევლის როლის მნიშვნელობა; საქართველოში დემოკრატიული არჩევნების განვითარების ისტორია და მოდერნიზებული არჩევნები; დემოკრატიული არჩევნების ჩატარების ძირითადი პრინციპები და საერთაშორისო სტანდარტები; ინკლუზიური საარჩევნო გარემო და გენდერული თანასწორობა საარჩევნო პროცესში; არჩევითი სახელმწიფო ორგანოები; საარჩევნო ადმინისტრაცია და ამომრჩევლებისთვის შეთავაზებული საარჩევნო სერვისები; არჩევნებში ჩართული სხვა მხარეები და მათი როლი დემოკრატიული არჩევნების ჩატარების პროცესში; სიძულვილის ენის და დეზინფორმაციისაგან თავისუფალი საარჩევნო გარემოს მნიშვნელობა მიიღეს ინფორმაცია.

„სასწავლო კურსი მიზნად ისახავს ახალგაზრდების საარჩევნო ცნობიერების ამაღლებას და სამოქალაქო პასუხისმგებლობის ზრდის ხელშეწყობას. ცესკო და სწავლების ცენტრი მადლობას უხდის საქართველოს განათლების, მეცნიერებისა და ახალგაზრდობის სამინისტროს, საგანმანათლებლო რესურსცენტრებს, საჯარო სკოლების დირექციას და მოსწავლეებს პროგრამის წარმატებით განხორციელებისთვის“, - აღნიშნულია ცესკოს მიერ გავრცელებულ ინფორმაციაში.

ცნობისთვის, პროექტი 2015 წლიდან ხორციელდება. დღემდე საინფორმაციო-სასწავლო პროგრამა 64 მუნიციპალიტეტში განლაგებული 2066 საჯარო სკოლის XI-XII კლასის 41104-მდე მოსწავლემ გაიარა.