ჩვენი კოლეგა, „ტვ მონიტორინგის“ რეპორტიორი, გორში მცხოვრები ბექა პირველი დედის სიცოცხლის გადასარჩენად დახმარებას ითხოვს.

როგორც ბექა პირველი სოციალურ ქსელში გამოქვეყნებულ პოსტში აღნიშნავს, დედის საბოლოო გამოჯანმრთელებისთვის მხოლოდ ერთი ნაბიჯია დარჩენილი - ძვლის ტვინის გადანერგვა. აღნიშნულ მკურნალობას სახელმწიფო 100%-ით აფინანსებს, თუმცა, მკურნალობის ბოლო ეტაპის დაწყებამდე, პაციენტს ესაჭიროება მაღალტექნოლოგიური კვლევა თურქეთის რესპუბლიკაში, რომლისთვის საჭიროა გარკვეული ფინანსური რესურსის მოძიება.

„მეგობრებო, ბოლო წლების მანძილზე მრავალ ნაცნობს თუ უცნობს აღმოვუჩინე დახმარება და ჩემთვის ეს ყველაზე სასიამოვნო პროცესია, მაგრამ ახლა ის ეტაპია, როდესაც კიდევ ერთხელ დამჭირდა თქვენი გვერდში დგომა და მხარდაჭერა.

შესაძლოა, ყველამ არ იცოდეთ, რომ დედაჩემი ონკოლოგიური პაციენტია, რომელსაც B უჯრედული ლიმფომის დიაგნოზი (სტადია 4) დაახლოებით 3 წლის წინ დაუსვეს. ამ ხნის მანძილზე ჩვენ გავიარეთ არაერთი ქიმიოთერაპიის, ქირურგიული თუ თერაპიული მკურნალობა და საკმაოდ კარგ შედეგსაც მივაღწიეთ.

გამოჯანმრთელების გზაზე მხოლოდ ერთი ნაბიჯი დაგვრჩა, ეს არის ძვლის ტვინის გადანერგვა. პროცედურა სახელმწიფოს მხრიდან 100%-ით ფინანსდება, მაგრამ მანამ უნდა ჩავიტაროთ მაღალტექნოლოგიური გამოკვლევა თურქეთში. PET CT კვლევა, რომლის პასუხზეც არის დამოკიდებული ძვლის ტვინის გადანერგვა. კვლევის სისწორეზეა დამოკიდებული სრულად ყველაფერი და ამიტომ გადავწყვიტეთ თურქეთში ჩატარება, რადგან, თავდაპირველად, სწორედ არასწორად დასმული დიაგნოზის გამო დამძიმდა ასე მდგომარეობა.

ხარჯი, ჯამურად, დაახლოებით, 1 100 დოლარამდეა. მინდა, მთელი გულით თხოვნით მოგმართოთ, რომ ამ თანხის შეგროვებაში დაგვეხმაროთ. სასიცოცხლოდ აუცილებელი კვლევაა, რომლის დამსახურებითაც საბოლოოდ გავიმარჯვებთ ამ ვერაგ სენზე, რომელსაც წლებია, თავდაუზოგავად ვებრძვით.

ჩვენმა ამბავმა დაგვაჯერა, რომ ერთიანობით სასწაულებიც ხდება. მრავალი ასეთი სასწაულის შემოქმედი თქვენთან ერთად მეც ვყოფილვარ და, სწორედ, ამ ერთიანობის იმედი მაქვს ახლაც.

არ მინდა, რომ ამდენი შრომა, ადამიანური თუ ფინანსური რესურსი წყალში ჩაგვეყაროს. მთელი გულით გთხოვთ, ნაცნობს თუ უცნობს, ვინც ამ წერილს წაიკითხავთ, რომ გვერდში დაგვიდგეთ ამ თანხის შეგროვებაში.

როგორც კი საჭირო თანხა შეგროვდება მოგაწვდით ინფორმაციას და პოსტს წავშლი, რომ ზედმეტად 1 ლარიც კი არ ჩაირიცხოს", - წერს სოციალურ ქსელში ბექა პირველი.

მსურველებს, თანხის ჩარიცხვა შეუძლიათ შემდეგ საბანკო რეკვიზიტებზე: თიბისი: GE31TB7923545064300061, საქართველოს ბანკი: GE70BG0000000162076850 (მიმღები: ბექა პირველი), ლიბერთი ბანკი: GE02LB0711171333989000 (მიმღები: ნელი ჯოლბორდი).