საქართველოს ცენტრალურმა საარჩევნო კომისიამ და სწავლების ცენტრმა, საქართველოს განათლების, მეცნიერებისა და ახალგაზრდობის სამინისტროსთან პარტნიორობით, მასშტაბური პროექტი „დემოკრატიული არჩევნები და საარჩევნო გარემო“ განახორციელა.

პროექტი საქართველოს მასშტაბით 23 მუნიციპალიტეტში, მათ შორის, შიდა ქართლში - კასპსა და ქარელში, ასევე, ეთნიკური უმცირესობებით კომპაქტურად დასახლებულ 5 მუნიციპალიტეტში, განხორციელდა და მასში 478 საჯარო სკოლის სამოქალაქო განათლების 510 პედაგოგი მონაწილეობდა.

„საარჩევნო განათლების მიმართულებით ჩატარებული პროექტი ახალგაზრდა თაობის საარჩევნო ცნობიერების ამაღლების კომპლექსური ამოცანის შესრულებას ემსახურება. საბაზო და საშუალო საფეხურის მასწავლებლებისთვის სწავლების ცენტრის მიერ შემუშავებული პროგრამა „დემოკრატიული არჩევნები და საარჩევნო გარემო“ ითვალისწინებს შემდგომში არჩევნების მოდულზე საგაკვეთილო პროცესის დაგეგმვის ხელშეწყობას და მოსწავლეებისთვის განახლებული ინფორმაციის გაზიარებას. ამ მიზნებისთვის პედაგოგებს გადაეცათ სწავლების ცენტრის მიერ სპეციალურად მომზადებული დამატებითი საინფორმაციო რესურსი, რომელიც მოიცავს განსახილველ საარჩევნო თემატიკას, თემის განვრცობისთვის განკუთვნილ საკითხავ მასალას, პრაქტიკულ სავარჯიშოებს და სარეკომენდაციო მითითებებს ჩატარების მეთოდოლოგიის შესახებ. ამასთან, შეხვედრების მონაწილეებთან განხილულ იქნა შემდეგი მნიშვნელოვანი საკითხები: ამომრჩევლის როლის მნიშვნელობა და პოლიტიკური კულტურის ასპექტები; დემოკრატიული არჩევნების ჩატარების პრინციპები და საერთაშორისო სტანდარტები; არჩევნების მოდერნიზაციის ტენდენციები და ხმის მიცემის პროცესში ელექტრონული ტექნოლოგიების გამოყენება; ამომრჩევლის საარჩევნო უფლების რეალიზება, ფარულობა და დაცულობა კენჭისყრის პროცესში; ინკლუზიური საარჩევნო გარემო; საქართველოს საარჩევნო ადმინისტრაციის მიერ ამომრჩევლებისთვის შეთავაზებული საარჩევნო სერვისები“, - აცხადებენ ცესკოში.

ცნობისთვის, სწავლების ცენტრმა პირველი საპილოტე პროექტი 2024 წელს განახორციელა. დღემდე პროექტი - „დემოკრატიული არჩევნები და საარჩევნო გარემო“ 42 მუნიციპალიტეტში განლაგებული 951 საჯარო სკოლის 988-მა სამოქალაქო განათლების პედაგოგმა გაიარა.