2025-2026 სასწავლო წლისთვის პირველკლასელთა რეგისტრაციის პირველი ეტაპის მონაწილეთა დოკუმენტების წარდგენის პროცესი დაიწყო.

განათლების მართვის საინფორმაციო სისტემის მიერ გავრცელებული ინფორმაციით, პირველ ეტაპზე რეგისტრირებული ბავშვებისთვის დოკუმენტების წარდგენის და ჩარიცხვის პერიოდი 2025 წლის 30 აპრილამდე გაგრძელდება.

როგორც ცნობილია, რეგისტრაციის პირველ ეტაპზე, 21 მარტის ჩათვლით, სკოლებში დარეგისტრირდნენ სპეციალური საგანმანათლებლო საჭიროების მქონე ბავშვები.

რაც შეეხება სტატუსს: სპეციალური საგანმანათლებლო საჭიროების მქონე მოსწავლედ შესაძლოა ჩაითვალოს ბავშვი, რომელსაც აქვს: ფიზიკური შეზღუდვა; ინტელექტუალური განვითარების დარღვევა; სწავლის უნარის დარღვევა; სენსორული განვითარების დარღვევა (სმენის და/ან მხედველობის); მეტყველების განვითარების დარღვევა; ქცევითი და ემოციური დარღვევა; გრძელვადიანი ჰოსპიტალიზაციის საჭიროება; სოციალური ფაქტორებით გამოწვეული სირთულეები სწავლაში, რის გამოც ვერ ძლევს ეროვნული სასწავლო გეგმის მოთხოვნებს; აუტიზმის სპექტრი.

ბავშვებს, რომლებსაც არ დაუდასტურდებათ სპეციალური საგანმანათლებლო საჭიროება საშუალება ექნებათ, რეგისტრაცია მომდევნო ეტაპებზე გაიარონ.

შეგახსენებთ, 1-ელ კლასში დარეგისტრირებას ის ბავშვები შეძლებენ, ვისაც 6 წელი 31 დეკემბრამდე უსრულდებათ. რეგისტრაცია კი 4 ეტაპად განხორციელდება. სამინისტრო მშობლებს მოუწოდებს, ყურადღებით გაეცნონ რეგისტრაციის ვადებს და პირობებს, რომ ბავშვის სკოლაში შეყვანა დროულად და შეუფერხებლად შეძლონ.