გორის მუნიციპალიტეტის მერის მოვალეობის შემსრულებელმა სიმონ გულედანმა საქართველოს სასკოლო სპორტული ოლიმპიადის რეგიონულ ეტაპზე გორის მუნიციპალიტეტის სახელით მოასპარეზე გუნდებს ახალი ეკიპირება გადასცა.

მუნიციპალურ ეტაპზე გორიდან გუნდები სპორტის ექვს სახეობაში მონაწილეობდნენ. რეგიონული ეტაპის შემდეგ გამარჯვებულები ზონალურ და დასკვნით ეტაპზე იასპარეზებენ.

„გორის მერია სპორტის განვითარებას მაქსიმალურად ხელს უწყობს. სასკოლო სპორტული ოლიმპიადის რეგიონულ ეტაპზე გუნდები ოთხივე მუნიციპალიტეტიდან იასპარეზებენ. გორის მუნიციპალიტეტის სკოლებიდან მონაწილე სპორტსმენებს სპორტული ეკიპირება გადავეცით. თითოეულ მათგანს ვუსურვებ წარმატებებს“, - აღნიშნა სიმონ გულედანმა.

საქართველოს სასკოლო სპორტული ოლიმპიადის 2024-2025 წლების სეზონი სექტემბერში დაიწყო და მაისში დასრულდება. შეჯიბრებები სპორტის 7 სახეობაში: მინი-ფეხბურთი, კალათბურთი, ხელბურთი, ფრენბურთი, მძლეოსნობა, ბადმინტონი და მაგიდის ჩოგბურთი ტარდება.