საზოგადოება
22.03.2025 11:12
თანასწორობის და მხარდაჭერისთვის - გორის მეათე ბაღში დაუნის სინდრომის საერთაშორისო დღე აღნიშნეს
დაუნის სინდრომის მსოფლიო დღის აღნიშვნასთან დაკავშირებით, გორის მუნიციპალიტეტის სკოლამდელი აღზრდის სააგენტოს ხელმძღვანელი გიორგი შათირიშვილი და თანამშრომლები მეათე ბაღს ესტუმრნენ, სადაც ბავშვებთან ერთად, სიმბოლურ ღინისძიებაში მიიღეს მონაწილეობა.
პატარებმა მხიარული და შემოქმედებითი აქტივობებით გამოხატეს მხარდაჭერა და სიყვარული აღნიშნული სინდრომის მქონე პატარების მიმართ.
„დაუნის სინდრომის მსოფლიო დღის აღნიშვნა ერთგვარი თანასწორობის და მხარდაჭერის გამოხატვაა. ღონისძიების მიზანი კი ინკლუზიის მნიშვნელობის გაძლიერება და საზოგადოების ცნობიერების ამაღლებაა.
ჩვენი ვალია, შევუქმნათ ყველას თანასწორი შესაძლებლობები, სადაც განსხვავებულობა ღირებულებაა“, - აცხადებენ ღონისძიების ორგანიზატორები.
შეგახსენებთ, 21 მარტი - დაუნის სინდრომის საერთაშორისო დღედ 2011 წლიდან, გაერთიანებული ერების ორგანიზაციის ეგიდით დაწესდა და მიზნად ისახავს დაუნის სინდრომის მქონე ადამიანების ღირსების და უფლებების დაცვას, მათ მონაწილეობას აქტიურ ცხოვრებაში და ამ კუთხით საზოგადოების ცნობიერების ზრდას.
