საზოგადოება
20.03.2025 15:17
საბავშვო ბაღებში ადმინისტრაციული და საგანმანათლებლო პერსონალის პროფესიული განვითარების მიზნით, ტრენინგები ჩატარდა
ადრეული და სკოლამდელი აღზრდის და განათლების გაუმჯობესების მიზნით, სან დიეგოს სახელმწიფო უნივერსიტეტის საკონსულტაციო კვლევითი ფონდის (SDSURF) ექსპერტები გორის მუნიციპალიტეტის საბავშვო ბაღების ადმინისტრაციულ და საგანმანათლებლო პერსონალს შეხვდნენ.
როგორც სკოლამდელი აღზრდის სააგენტოში აცხადებენ, ექსპერტებმა სამიზნე აუდიტორიასთან ისაუბრეს ისეთ თემებზე, როგორიცაა კურიკულუმის მიზნები, კვლევა-აღმოჩენა, ბავშვების თვითრეგულაცია, კონფლიქტის მოგვარება, ბავშვების ინტერესების გაღრმავება, სოციალური ცნობიერება, თამაშები, სენსომოტორული კვლევები და ასაკობრივი განსხვავებები.
ტრენინგის ფარგლებში, აღმზრდელებმა ასევე იმუშავეს ჯგუფურ დავალებებზე და პრეზენტაციები წარადგინეს.
„ტრენინგების ციკლი, რომელიც I2Q პროექტის ფარგლებში, მსოფლიო ბანკის მხარდაჭერით ექვს საპილოტე მუნიციპალიტეტში ჩატარდა, მიზნად ისახავს საბავშვო ბაღის საგანმანათლებლო და ადმინისტრაციული პერსონალის პროფესიულ განვითარებას.
უნდა აღინიშნოს, რომ ჩატარებული ტრენინგების წარმატებული პილოტირების და მიგნებების კვალდაკვალ, სან დიეგოს სახელმწიფო უნივერსიტეტის ექსპერტები მენტორინგის ვიზიტების გაუმჯობესებულ ციკლს გორის მუნიციპალიტეტში განმეორებით ატარებენ“, - აცხადებენ სკოლამდელი აღზრდის სააგენტოში.
