ქარსაფარი (მინდორდაცვითი) ზოლების ინვენტარიზაციის პროცესი 2027 წლის 1-ელ იანვრამდე მთელი ქვეყნის მასშტაბით დასრულდება, - ინფორმაციას გარემოს დაცვისა და სოფლის მეურნეობის სამინისტრო ავრცელებს.

უწყების ინფორმაციით, პარლამენტმა საგაზაფხულო სესიის პლენარულ სხდომაზე მხარი დაუჭირა „ქარსაფარი (მინდორდაცვითი) ზოლის შესახებ“ საქართველოს კანონში ცვლილების პროექტს, რომელიც ინვენტარიზაციის პროცესის ვადის გახანგრძლივებას 2027 წლის 1-ელ იანვრამდე ითვალისწინებს.

ცვლილების პროექტი საქართველოს პარლამენტში გარემოს დაცვისა და სოფლის მეურნეობის მინისტრის პირველმა მოადგილე ნინო თანდილაშვილმა წარადგინა და ხაზი გაუსვა, ინვენტარიზაციის პარალელურად, ქარსაფარი ზოლების აღდგენა/გაშენების პროცესის დაწყების მნიშვნელობას.

ცნობისთვის, ქარსაფარი (მინდორდაცვითი) ზოლების ინვენტარიზაციის სახელმწიფო პროგრამა 2021 წელს დაიწყო. ამ ეტაპისთვის, ინვენტარიზაცია 12 მუნიციპალიტეტში, 6675.53 ჰექტარ ტერიტორიაზეა ჩატარებული. ქარსაფარი ზოლების ფუნქცია ნიადაგის ქარისმიერი ეროზიისგან დაცვა და მისთვის ნაყოფიერების შენარჩუნებაა.