თავდაცვის მინისტრი გორში იმყოფებოდა. ირაკლი ჩიქოვანმა თავდაცვის ძალების მეთაურთან გიორგი მათიაშვილთან ერთად, სამხედრო გაწვევისა და რეკრუტირების შიდა ქართლის და სამცხე-ჯავახეთის რეგიონული ცენტრი გახსნა.

საზეიმო ღონისძიებას თავდაცვის მინისტრის მოადგილეები, თავდაცვის ძალებისა და ადგილობრივი ხელისუფლების წარმომადგენლები ესწრებოდნენ.

სტუმრებს სამხედრო გაწვევისა და რეკრუტირების ეროვნული სააგენტოს დირექტორმა, პოლკოვნიკმა ირაკლი ჭითანავამ ცენტრის ინფრასტრუქტურა დაათვალიერებინა და მისი ამოცანები გააცნო.

„შიდა ქართლის და სამცხე-ჯავახეთის რეგიონული ცენტრის პროფესიონალი, კვალიფიციური თანამშრომლები, ასევე, თანამედროვე ინფრასტრუქტურა საშუალებას იძლევა მივიღოთ თავდაცვის ძალებში სამსახურის ყველა მსურველი. ჩვენთვის მნიშვნელოვანია, პირად შემადგენლობასთან კომუნიკაციისას მოქალაქეებს თავდაცვის ძალების, მისი შესაძლებლობებისა და შეთავაზებული პირობების შესახებ რეალური აღქმა ჰქონდეთ. მოხარული ვარ, რომ ამ რეგიონული ცენტრის რამდენიმეთვიანი მუშაობის შედეგი არის დამაიმედებელი. ჩვენ ვაგრძელებთ სამხედრო გაწვევისა და რეკრუტირების ეროვნული სააგენტოს საქმიანობის მხარდაჭერას. დარწმუნებული ვარ, თავდაცვის ახალი კოდექსით გათვალისწინებული რეფორმა იქნება პოზიტიური და დადებითი შედეგის მომტანი საქართველოს თავდაცვის ძალებისთვის“, - აღნიშნა თავდაცვის მინისტრმა ირაკლი ჩიქოვანმა.

თავდაცვის ძალების სამხედრო გაწვევისა და რეკრუტირების ეროვნული სააგენტო 8 რეგიონულ ცენტრს და 81 მუნიციპალურ განყოფილებას მოიცავს. სააგენტო თავდაცვის ძალების რეგულარული და სარეზერვო სამხედრო სამსახურების შესაბამისი პერსონალით დაკომპლექტებისთვის საჭირო აღრიცხვიანობას, რეკრუტირებას და გაწვევის ღონისძიებებს ახორციელებს.

შეგახსენებთ, წვევამდელთა გაწვევის პროცესის უზრუნველსაყოფად, ერთიანი ელექტრონული სისტემა შეიქმნა, რომელიც შემთხვევითობის პრინციპზე აგებული ალგორითმით წვევამდელთა შერჩევას ახორციელებს. ასევე, შემცირდა წვევამდელთა ეროვნული სამხედრო სამსახურის ვადები, ანაზღაურება კი მნიშვნელოვნად გაიზარდა. თავდაცვის ახალი კოდექსით სავალდებულო სამხედრო სამსახური სრულიად განახლდა და 1-ელი იანვრიდან წვევამდელთა ეროვნული სამსახურით შეიცვალა, რომლის გავლაც მხოლოდ თავდაცვის ძალებშია შესაძლებელი.